Stefnir í einn af hlýjustu febrúarmánuðum

Meðalhitinn í Reykjavík þegar 20 dagar eru liðnir af mánuðinum er nú kominn upp i 2,6 stig eða 2,7 stig yfir meðallagi. Ef mánuðurinn héldi þeirri tölu yrði hann sjötti eða sjöundi hlýjasti febrúar.

En það eru ansi litlar líkur á því að hann haldi þessari tölu. 

Þvert á móti eru allar líkur á að hún muni hækka umtalsvert næstu daga! Ekki sjást nema mikil hlýindi í spám nema hvað eitthvað muni kólna tvo síðustu daga mánaðarins.

Þetta eru jú bara spár en það er mjög líklegt að meðalhiti mánaðarins eigi eftir að stíga upp í þrjú stig í Reykjavík og jafnvel hærra. 

Aðeins fimm febrúarmánuðir frá upphafi mælinga í höfuðstaðnum hafa náð að vera yfir þremur stigum, 1932, 1965, 1964, 2006 og 1929. 

Og þessi febrúar kemur á eftir janúar sem var vel inni á topp tíu listanum yfir hlýjustu janúarmánuði á landinu og líka í Reykjavík.

Á Akureyri eru meðalhitinn nú 1,0 stig eða 3,0 stig yfir meðallagi. En mánuðurinn nær ekki enn inn á lista þar yfir tíu hlýjustu febrúarmánuði.

Það verður spennandi hvað þessi mánuður ætlar að gera í hitanum! 

Viðbót 23.2.: Mánuðurinn er nú kominn í 3,0 stig í Reykjavík og verður gaman að vita hvort hann kemst upp í 3,5 stig sem er að mínu áliti alveg mögulegt. Og hver veit nema hann nái þá bronsinu af 1964 í febrúarhlýindakeppninni! En vonin um silfur eða gull er alveg vonlaus. 

Skrár tengdar þessari bloggfærslu:

• akrv_2013_12_0.xls

Athugasemdir

[Emil Hannes Valgeirsson, 21.2.2013 kl. 17:39]

Spurning hvar þetta endar og hvort við lendum í miskunnarlausri gagnsárás heimskautaloftsins.

[Sveinn Atli Gunnarsson, 21.2.2013 kl. 20:46]

Vér fylgjumst spenntir með!

Hvernig er annars með fyrstu tvo mánuðina (ef maður tekur þá saman) - er mögulegt að sjá hvernig sú staða lítur út miðað við fyrri ár?

[Sigurður Þór Guðjónsson, 22.2.2013 kl. 13:11]

Það kólnar víst síðustu tvo dagana og mars mun heilsa með verulegu kuldakast hverju ekki mun linna fyrr en á Seljumannamessu! En ef við gerum ráð fyrir að meðalhiti þessa mánaðar verði kominn í 3 stig á morgun, sem blasir við, hefur í Reykajvík frá áramótum aldrei verið hlýrra nema 1964 en næst á eftir okkur núna kemur þá 1929. Báða þessa vetur var það mars sem setti glæsilegna lokahnykk á veturna sem eru þeir hlýjustu í heild. En ætli okkar mars glutri ekki öllu niður á lokasprettinum eins og strákarnir okkar

[Sigurður Þór Guðjónsson, 22.2.2013 kl. 13:21]

Þriðji og fjórði mars gætu t.d. orðið ansi skæðir, svo varla verða þeir skæðari, og gætu komið með kuldamet. Ef það er þá nokkuð að marka þessar spár!

[Björn Jónsson (IP-tala skráð) 23.2.2013 kl. 14:27]

Ekki má síðan gleyma febrúar 2006 í upptalningu á sérlega hlýjum febrúarmánuðum.

[Sigurður Þór Guðjónsson, 23.2.2013 kl. 18:44]

Nei auðvitað ekki Björn enda á þarna að standa 2006 en ekki 1926. Verður snarlega leiðrétt.

[Gunnar Th. Gunnarsson, 24.2.2013 kl. 13:05]

 "En ætli okkar mars glutri ekki öllu niður á lokasprettinum eins og strákarnir okkar".

[Sigurður Þór Guðjónsson, 24.2.2013 kl. 13:14]

Nú er ekki gert ráð fyrir að kuldakastið i byrjun mars verði eins svívirðilegt og fyrri spár voru með.