Veðurdagatal fyrir október

Hér birtist eins konar veðurdagatal fyrir október, líkt og  áður hefur birst fyrir september, hvað varðar meðalhita sólarhringsins, hámarks- og lágmarkshita, sólarhringsúrkomu og daglegar sólskinsstundir í Reykjavík, ásamt hámarks-og lágmarkshita á öllu landinu. Þetta sést á fylgiskjalinu en þarf dálítilla skýringa við.

Lengst til vinstri er mesti og minnsti meðalhiti sólarhringsins sem mælst hefur í Reykjavík frá 1949 og einnig árin 1920-1923. Næst kemur meðalhiti mesta og minnsta hita sólarhringsins frá 1935 til 1948 en ekki raunverulegur meðalhiti. Munurinn á þessu tvennu er yfirleitt mjög lítill að meðaltali heils mánaðar en getur orðið nokkur dag og dag. Meðalhitinn er hins vegar ekki tiltækur nema frá 1949 og árin 1920-1923. Meðalhitinn frá 1949, er opinber meðalhiti frá Veðurstofunni. Einnig sést þarna meðalhiti mesta og lægsta hita sólahringsins árin 1888 til 1903, sambærilegt við árin 1935-1948 og tekinn af sírita en ekki kvikvasilfursmæli. Loks er meðalhiti hæsta og lægsta álesturs á mæli þriggja athugana frá morgni til kvölds árin 1907 til 1919 en ekki meðaltal raunverulegs hámarks-lágmarkshita. Þessi gildi eru líklega hærri en orðið hefði ef þau sýndu meðaltal hámarks-og lágmarks. Aðrar mælingar en þessar  voru bara ekki gerðar  Reykjavík þetta tímabil. Árin 1907-1919 standa því eiginlega sér og sýna aðallega hvaða dagar voru hlýjastir og kaldastir á þessu tímabili en erfitt er að bera dagana þessi ár saman við dagana á hinum árunum nema einna helst allra köldustu dagana.    

Hámarks og lágmarkshiti í Reykjavík á hvejrum degi er hér allur í einu lagi alveg frá 1935 og til okkar daga en síðan útaf fyrir sig frá 1881 til 1903 fyrir lágmarkið en 1885 til 1907 fyrir hámarkið  og svo er það líka sér á parti sem hæst og lægst var lesið á mæli 1907 til 1919.

Ekki eru tiltækar tölur fyrir daglegan meðalhita, hámark og lágmark árin 1924-1934. Þau ár koma því ekki til álita hér enn sem komið er að minnsta kosti hvað hitann snertir en hins vegar bæði fyrir sólskin og úrkomu. Það er auðvitað hið versta mál en verður svo að vera. Þó er hér ein stök hámarkshitamæling fyrir Reykjavík, tekin úr Veðráttunni en hún er hærri en allar aðrar tiltækar tölur og fellur á síðasta dag mánaðarins

Hámarkshiti er lesin á veðurstöðum á þrennan hátt, frá kl. 9-18, kl. 9 að morgni frá klukkan 18 eða 21 deginum áður og svo er lesið kl. 18 og gildir frá kl. 18 daginn áður og eru það þær tölur sem alltaf eru prentaðar í Veðráttunni, yfirlitsriti Veðurstofunnar um hvern mánuð. Þær hafa þann galla að þegar mjög hlýtt hefur verið kl. 18 einhvern daginn er hætt við að sá hiti verði meiri en mælist allan næsta dag eftir kólnun næturinnar. Þá sitjum við uppi með hita á ákveðinni dagsetningu sem mældist í rauninni daginn áður en ekki á þeim degi sem við á! Gott dæmi um þetta er einmitt mesti hiti sem mælst hefur í október samkvæmt opinberum skýrsLum, 15.7 stig, 1958, en hann mældist í rauninni kl. 18 30. september en skráður 1. október en þann dag fór hitinn ekki  hærra en í 15.4 stig. Frá þessum ágalla hefur verið reynt  að sneiða hjá að mestu og eru þessar töflur því unnar eftir öllum þessum þremur hámarkstöflum, frá 18/21- 9, 9-18 og svo frá 18-18. Ef einhver skilur þetta þá má hann kallast innmúraður og innvígður! Hinir geta bara trúað því möglunarlaust sem ég ber á borð fyrir þá í þessum glæsilegu töflum á þessari veðurglöðu blogsíðu!  

Sólarhringsúrkoman er í tvennu lagi, annars vegar frá stofnun Veðurstofunnar 1920 og áfram og hins vegar árin 1885 til 1907.

Fjöldi sólskinsstunda á dag er frá árinu 1923.

Þessar töflur allar hef ég útbúið sjálfur eftir uppgjöri hvers mánaðar um sig en þetta eru ekki tilbúnar töflur frá Veurstofunni eins og þær liggja fyrir hér.   

Mesti og minnsti hiti á öllu landinu hvern sólarhring er aðeins tiltækur fyrir hvern dag frá 1949 frá skeytastöðvum og 1961 fyrir aðrar stöðvar en  auk frá Teigarhorni frá 1937. Hins vegar er bætt við nokkrum stökum gildum sem birst hafa sem hámark eða lágmark alls mánaðarins í Veðráttunni á árunum 1920-1948 og eru hærri eða lægri en öll dagsgildin frá 1949. Hita frá sjálfvirkum stöðvum síðari ára má til gamans sjá í flipum ef þær slá út það sem kvikasilfursmælarnir hafa mælt en þetta eru þó fyrst og fremst kvikasilfursmælingar enda hafa sjálfvirkar hitamælingar aðeins staðið í nokkur ár. Í flipum má einnig sjá þegar um fleiri en eina ársetningu er að ræða og ýmsar athugasemdir. Lesiði endilega flipana til að sjá hvað í þeim stendur! 

Villur geta verið hér á vappi og jafnvel meinlokur en þær verða leiðréttar undireins og upp um þær kemst.

Stefnt er að því á Allra veðra von að útbúa sams konar dagatal fyrir alla mánuði ársins og þegar fram í sækir einnig ýmislegt lesmál og kort fyrir um veðrið hvern dag ársins. Á þetta að vera tilbúið í síðasta lagi á næsta nýjársdag.

Heimildir: Íslenzk veðurfarsbók, 1920-1923, Veðráttan 1924-2003, Veðurfarsyfirlit 2004-2007, vefsíða Veðurstofunnar, ýmis laus gögn frá Veðurstofunni.  

Næstu daga er yfirvofandi að birtist hér síðunni æsispennandi færslur um hlýjustu og köldustu októbermánuði og um hlýja daga og kuldaköst í þessum mánuði.       

Skrár tengdar þessari bloggfærslu:

• c_documents_and_settings_fri_geir_my_documents_okthly.xls