ÞÞ í fátæktarlandi- vonbrigði aldarinnar

Aldrei á ævi minni hef ég orðið fyrir öðrum eins vonbrigðum með nokkra bók.

Þessi bók er sögð þroskasaga Þórbergs. En hún er það ekki, Hún er hvorki þroskasaga né ævisaga. Hún er skáldsaga um Þórberg til 45 ára aldurs. Þórbergi er lýst sem hverri annarri skálskaparpersónu og það eru sett upp heilu leikritin (sem reyndar eru skemmtilegustu kaflar bókarinnar), tímatalið er óljóst, spurningar spurðar sem ekkert er skeytt um að svara; allt hefur yfirbragð skáldskaparins,  sveipað mósku og fjarlægð.  

Þetta eru skelfileg vonbrigði.

Ævisaga Þórbergs, unnin  af sagnfræðilegri rýni og bókmenntafræðilegri innsýn, er óskrifuð eftir sem áður. Það sem einna lengst kemst í þá átt eru Þórbergsþættirnir í Skáldalífi Halldórs Guðmundssonar, þeirri ágætu bók.

ÞÞ í fátæktarlandi eftir Pétur Gunnarsson hefur hins vegar nánast ekkert gildi frá sagnfræðilegu-og bókmenntafræðilegu sjónarmiði. Flest af því sem í bókinni stendur hefur komið fram annars staðar, á skýran og skilmerkilegan hátt, að undanteknum nokkrum upplýsingum um kvennamál Þórbergs en þau eru samt hulin sömu dulúð og annað í bókinni.  

Ég skil bara ekki hvað menn eru að fara með svona bók. En ég skil vel að það var ætlun höfundarins að svona yrði bókin og ekki öðru vísi. Saga skálds um skáld. En geta skáld ekki skrifað eðlilega og upplýsandi um önnur skáld?      

Þetta er skáldsaga eftir Pétur Gunnarsson. Og sem slík er hún veigaminnsta skádsaga hans.

Athugasemdir

[Jenný Anna Baldursdóttir, 22.11.2007 kl. 19:14]

Æi, ég vildi að ég hefði ekki rekist á þessa færslu.  Er svo áhrifagjörn.  Held samt áfram veginn í mínum einbeitta vilja til að lesa bókina.

Takk fyrir mig.

[Lára Hanna Einarsdóttir, 22.11.2007 kl. 19:54]

Ég ætla líka að lesa þessa bók og verð kannski sammála - kannski ósammála. Þessi færsla eykur bara spennuna hjá mér.

En ég fer ekki að bregða út af áratugalangri hefð að lesa allt sem um Þórberg er skrifað, svo ekki sé talað um allt sem hann skrifaði sjálfur.

Svo er ég svo stálheppin að ég man ekkert stundinni lengur og get því lesið þetta allt saman aftur og aftur - og það er alltaf nýtt og ferkst. Ekki slæmt.

[Sigurður Þór Guðjónsson, 22.11.2007 kl. 20:02]

Bækur eru mannskemmandi!

[Lára Hanna Einarsdóttir, 22.11.2007 kl. 20:13]

Já, já... örugglega margar, ef ekki bara allar. Ég virðist þá laðast að því sem er mannskemmandi og hef bara mjög gaman af. Einhver verður víst að taka það að sér. Verst að fá ekki borgað fyrir það eins og sumir rýnendur.

[Sigurður Þór Guðjónsson, 23.11.2007 kl. 00:26]

Bækur eru fyrir fífl.

[Hallgerður Pétursdóttir (IP-tala skráð) 23.11.2007 kl. 07:03]

Skellihlátur Sigurður,má ekki segja að textinn hjá þér núna sé nokkuð knappur ?eitthvað er nú lágskýjað sýnist mér enda leiðinda tíð . En bráðum kemur betri tíð  .................

[Yngvi Högnason, 23.11.2007 kl. 08:57]

Það er gaman til þess að vita að einhver sé hér á meðal okkar, sem að gleypir ekki allt hrátt sem að um ÞÞ eða HKL er ritað. Sú goðadýrkun varðandi þessa menn sem að margir stunda er óskiljanleg, manna sem að gátu skrifað nokkru betur en aðrir en voru kannski óalandi og óferjandi á öðrum vettvangi.

[Sigurður Þór Guðjónsson, 23.11.2007 kl. 11:28]

Hallgerður: Varstu komin með bloggsíðu og svo hætt aftur. Þú ert einmitt bloggtýpan. Yngvi: Sannaðu til: Ritdómarar munu hrósa þessari bók í hástert fyrir innsæi og speki. Frægur höfundur um frægan höfund! Pétur dregur reyndar fram veikleika Þórbergs í kvennamálum. Svo ég gleðji hana Hallgerði enn frekar: Þórbergur var síðlaust fífl!

[Sigurður Þór Guðjónsson, 24.11.2007 kl. 13:15]

Yngvi: Það er strax byrjað að mæra bókina - í Lesbókinni í dag. Þar er líka vikið að þeirri ranghugmynd að það sé hlægilegt að skrifa ævisögu Þórbergs af því að hann hafi sjálfur gert það svo vel og engir leiki eftir honum stílsnilldina. En mönnum er það löngu ljóst að "ævisögur" Þórbergs eru bara skáldverk. Sama þörf er á krítískri ævisögu um manninn og verk hans eins og um önnur skáld sem skálduðu heil ósköp. En eitt skáldverk í viðbót um Þórberg er ekki það sem mest þörf er á. Verst er að kannski seinkar það alvarlegri ævisögugerð um Þórberg um mörg ár eða jafnvel áratugi.

[Sigurður Þór Guðjónsson, 24.11.2007 kl. 13:22]

Já, ég segi það, þó ég verði kannski talinn neikvæður fyrir vikið, að svona bók um Þórberg er það versta sem gat komið fyrir.

[Lára Hanna Einarsdóttir, 24.11.2007 kl. 14:50]

Tekurðu oft út athugasemdir?

[Sigurður Þór Guðjónsson, 24.11.2007 kl. 15:07]

Eiginlega aldrei. En þetta var of mikill galgopaskapur í alvörumáli.

[Þórunn Hrefna (IP-tala skráð) 25.11.2007 kl. 01:39]

Í fátæktarlandi, Sigurður, ekki fátækralandi.

Sbr. áletrunina á legsteininum:

Liggur hér Þórbergur.

Lifði í fátæktarlandinu.

Dó í forheimskunarlandinu.

Dó í forheimskunarlandinu.

Er bara nýbyrjuð á bókinni, en mig grunar að ég verði ekki sammála þér í þetta sinn.

Annars. Allar góðar óskir.

[Sigurður Þór Guðjónsson, 25.11.2007 kl. 09:03]

Ég hélt pönkína alltaf að ég væri að skrifa "Í fátæktarlandi!" Svona virka meinlokur. Takk fyrir ábendinguna. Verður snarlega lagað. Maður er ekki skrifandi þó maður froðufelli. En ég hef bara orðið fyrir svona miklu tráma yfir að lesa þessa fátækt. Svo átt þú að vera mér sammála í einu og öllu!!