Skammdegið er liðið

Nú er skammdeginum lokið samkvæmt þeirri viðmiðun sem ég nota og finnst skynsamleg. 

Samkvæmt henni er skammdegi þegar sólin er á lofti minna en einn þriðja þess tíma sem hún er lengst á lofti. Skammdegið hófst þá 11. nóvember og síðasti dagur skammdegisins var í gær.

En veturinn er ekkert búinn. Nú er kaldast tími ársins.

Það lítur ekki út fyrir mikil hlýindi á næstunni, aðeins hlákublota. Ég óttast að þetta verði kaldur, langur og leiðinlegur vetur.

Athugasemdir

[Ellismellurinn (IP-tala skráð) 1.2.2008 kl. 14:20]

Einhverntíma höfum við skipst á skoðunum um þetta atriði (skammdegið) og nú sé ég að okkar skilgreining er nokkuð svipuð, þótt aðeins muni örfáum dögum. Viðmiðunin er líka svolítið öðruvísi. Ég miða við 15. nóv. til og með 25. jan. sem byggist á 6° hæð sólar á (sólar)hádegi yfir sjónbaug í Reykjavík. Sólarhádegið í Reykjavík í dag er líklega kl. 13:41, getur það ekki verið Sigurður? Ég er handviss um að þú ert með það á hreinu, svona tölfræðigagnabanki eins og þú ert hvað alla svona hluti varðar.

[Lára Hanna Einarsdóttir, 1.2.2008 kl. 14:20]

Veturinn er nú þegar orðinn kaldur, langur og leiðinlegur. Of mikil úrkoma í alls konar formi og of lítil sól. Finnst mér.

[Sigurður Þór Guðjónsson, 1.2.2008 kl. 14:44]

Háveturinn er nú alltaf sólarlítill og mikil vetrarsól er ávísun á kulda. Besta vetrarverðrið er eins og var eftir nýár: skýjað með sólaarglætu, milt og úrkomulítið.

[Lára Hanna Einarsdóttir, 1.2.2008 kl. 15:00]

Við höfum nú haft ansi marga snjólétta vetur undanfarin ár, og hvert hlýindametið eftir annað slegið. Maður á kannski ekki að vera að kvarta þótt það komi einn leiðindavetur á margra ára fresti. Taka þessu bara á stóíkinni. Spurning hvernig framtíðarveturnir verða...

[Emil Hannes Valgeirsson, 1.2.2008 kl. 15:53]

Venjan síðustu ár hefur verið sú að við höfum fengið mikla hlýindakafla inn á milli kaldari daga um þetta leiti og svo síðasta kuldakastið einhverntíman í maí. Mér finnst þessi vetur minna um margt á það sem var hér áður fyrr, áður en fór að hlýna.

[Sigurður Þór Guðjónsson, 1.2.2008 kl. 16:38]

Já, Emil, þetta finnst mér líka og mig grunar að mestu hlýindin séu að baki í bili enda hafa þau ekki verið neitt venjuleg, alveg áháð gróóðurhúsaáhrifunum. En ég vona allt það besta.