Fallvalt er lífsins gengi

Haustið sem ég varð ellefu ára var langvinsælasta lagið To Know Him is to Love Him sem sungið var af tríóinu The Teddy Bears. Þar var blíðleg stúlkurödd mest áberandi og  sú sem átti hana hét Annette Kleinbard. Textin var inblásinn af legsteini föður lagahöfundarins. 

Það er sorg og innileiki í þessu lagi en það gæti svo sem alveg verið erótískt líka og það held ég að hafi einmitt gengið svona vel í lýðinn. Og hysterískir lesendur þessarar bloggsíðu skulu fá að vita að þetta var síðasta haustið sem bloggarinn var náttúrulaus en einhver snemmnáttúra hefur verið kominn í hann því hann var alveg heillaður af þessu lagi. Og allur heimurinn grét af gleði yfir laginu.

Og þá var nú heimurinn bjartur og hlýr þrátt fyrir smávegis kalt stríð stórveldanna. Rokkið var upp á sitt besta og Ísland var að verða velmegunarland. Og bloggarinn var saklaus og náttúrulaus eins og engill.

Sá sem samdi þetta lag var aðeins 17 ára og varð síðar frægur og ríkur  í tónlistarheiminum fyrir ýmislegt annað en semja lög.

Nú er búið að dæma hann fyrir morð. 

Ég veit ekki hvort einhverjum þyki nokkuð vænt um hann sem til hans þekkja. 

Lífið er þjáning, sagði meistari Búdda.   

 

Phil Spector fundinn sekur um morð

Athugasemdir

[Hólmfríður Pétursdóttir, 14.4.2009 kl. 00:08]

Það var nú þá. Það kemur fyrir að ég raula þetta lag enn, sætt og ljúft.

Spector virðist hafa orðið algjör andstæða þess.

[Hilmar Gunnlaugsson, 14.4.2009 kl. 01:06]

Leiðinlegt hvernig hefur farið fyrir þessum mikla brautryðjanda í tónlistarheiminum.

[sandkassi (IP-tala skráð) 14.4.2009 kl. 01:42]

banvænn og músikalskur furðufugl. Megi hann sitja fallega af sér bæði vel og lengi.