Allt búið

Í gær varð mesti hiti á landinu 19,5 stig á Þingvöllum. Í nótt fór frostið þar niður í 2,4 stig. Loftið er mjög þurrt. Þetta er dægursveifla upp á 22 stig. Á þessari stundu er 12 stiga hiti á Þingvöllum.

Hitinn á landinu er reyndar að detta niður. Það er bara svona sæmilegt þar sem best lætur en ekki hægt að tala um nein sérstök hlýindi. Á stórum hluta landsins hefur reyndar verið að kólna jafnt og þétt í eina fimm daga.

Hitinn hefur hvergi náð 20 stigum í þessu hlýindakasti og er því ekki hægt að segja að um hitabylgju hafi verð að ræða. Einna best hefur til tekist á suðvesturlandi. Dagurinn í gær sló dægurhitamet fyrir Reykjavík líkt og dagurinn þar á undan.

En þetta er sem sagt búið. Það var hvort sem er bara verið að hita upp fyrir rigningarsumarið mikla 2009! 

Athugasemdir

[Emil Hannes Valgeirsson, 18.5.2009 kl. 13:20]

Rigningarsumarið mikla er rétt handan við hornið. Einn af alverstu júnímánuðum í Reykjavík kom einmitt árið 1988 eftir sambærileg hlýindi í maímánuði eins og þú rifjaðir upp um daginn.

[Lára Hanna Einarsdóttir, 18.5.2009 kl. 14:40]

Þegar þið talið um rigningasumar, strákar... eigið þið þá við hér suðvestanlands eða verður rigning um allt land?

[Sigurður Þór Guðjónsson, 18.5.2009 kl. 14:46]

Stundum er rigningaarsumar víðast hvar en aðallega er ég að tala um rigningarsumur á suðurlandi. Þá er oft gott fyrir norðan.

[Lára Hanna Einarsdóttir, 18.5.2009 kl. 14:48]

Já, einmitt... Ég hef nefnilega hugsað mér að skottast norður á Strandir og síðan austur með Norðurlandi. Vonandi verður ekki mjög mikil rigning á þeim slóðum því ég verð í tjaldi.

[Sigurður Þór Guðjónsson, 18.5.2009 kl. 14:59]

Norlenska sumarrigningin er miklu svalari en sunnlenska rigningin.

[Emil Hannes Valgeirsson, 18.5.2009 kl. 15:16]

Ég hef annars verið að hræða fólk í vinnunni með því að boða rigningarsumar að þessu sinni, og þá aðallega vegna þess að fólk tekur svo mikið mark á manni þegar kemur að veðri. Í rauninni á aldrei að taka mikið mark á svona veðurspádómum nokkra mánuði fram í tímann, en rigningarsumar kæmi mér þó ekkert á óvart.

[Sigurður Þór Guðjónsson, 18.5.2009 kl. 16:04]

Rigningarsumarið 2009 klikkar ekki!

[Emil Hannes Valgeirsson, 18.5.2009 kl. 16:39]

Vitanlega ekki. Þó verða færri ísbirnir en venjulega, nema kannski einhverjir norður á Ströndum.

[Lára Hanna Einarsdóttir, 18.5.2009 kl. 21:59]

Kannski maður fari með vopn á Strandir í sumar. Kunnið þið að búa til teygjubyssu, strákar? 

[Svava frá Strandbergi , 19.5.2009 kl. 13:03]

Það skal verða sól í allt sumar.