Hvað gerðist á Hæli í nótt

Kuldametið í júlí á Eyrarbakka féll í nótt. Þar mældist hitinn 0,5 stig. Gamla metið var 1,4 stig frá   15.  júlí 1979 og svo 1,5 stig 18. júlí 1983 og þ. 8. 1973.  Athuganir á lágmarkshita eru til frá 1924. Hitinn á sjálfvirku stöðinni fór niður í -2,2 stig. Það er mikill munur á þessum mælingum og er það oft þannig á Eyrarbakka. Munur á sjálfvirkri og kvikasilfurs mælingu virðist vera mismunanndi milli stöðva. Þetta hlýtur að valda vandræðum með staðfestingu meta á stöðvum sem voru lengi mannaðar en eru nú sjálfvirkar eingöngu.

Engar upplýsingar er enn að hafa frá Hæli í Hreppum. Það er spurning hvort júlí kuldametið frá 1888 í Hreppunum, 0,7 stig, hafi ekki líka fallið í nótt. Á sjálfvirku stöðinni í Árnesi skammt frá Hæli var hitinn um frostmark á miðnætti, bara sisvona, og lágmarkið var -0,7 stig. Þarna mátti heita logn frá því klukkan 3 í nótt og til klukkan 9.

Aftur var frost í nótt á Hellu, -0,5 stig, og í Þykkvabæ, -1,7 stig,  sem er enn meira en þar mældist í fyrrinótt.

Á þingvöllum var frostið -2,0 stig og -1 við Þjórsárbrú. Meira frost mældist á sjálfvirku stöðinni á Þingvöllum í júlí 2007, -2,5 stig.

Á Egilsstöðum voru -0,8 stig og -0,2  á Hallormsstað.  Mesta frost sem mannaða stöðin á Egilsstöðum mældi í júlí í 44 ár var  -0,5  árið 1965 og sama ár var metið á Hallormstað,  -1,0 .  Á   Fáskrúðsfirði voru í nótt -2,3 stig en þessi stöð sýnir stundum svo einkennilega lágan lágmarkshita að maður spyr sig hvort ekki sé eitthvað athugavert við hann. 

Kaldast á landinu var hins vegar -2,6  stig á Möðruvöllum. Það er nokkuð frá meti en þessum stað hefur mælst mesta frost á landinu í júlí, -4,1 stig þ. 21. árið 1986 á kvikasilfursmæli.

Ekki hafa fallið kuldamet í þessu kasti þar sem lengi hafa verið mannaðar stöðvar  annars staðar en á Eyrarbakka nema þá á Hellu, í Þykkvabæ, hugsanlega á Brú og Egilsstöðum, en stóra spurningin er svo um Hæl.

Vonandi koma upplýsingar um mælingar frá Hæli seinna í dag. 

Viðbót: Mælingarnar á Hæli hafa nú verið birtar. Lágmarkið var svo hátt sem 3, 0 stig. Þar féll því ekkert kuldamet. Stöðin í Árnesi er nokkurn spöl frá Hæli og er auk þess sjálfvirk. En þessi gríðarlegi munur sem kemur fram á lágmarki milli sjálfvirkra mæla og kvikasilfursmæla í þessum tveimur tilvikum, á Eyrarbakka þar sem stöðvarnar eru alveg á sama stað og svo milli Hæls og Árness, mjög nálægra stöðva, finnst mér sýna enn frekar hvað erfitt er að bera saman sjálfvirkar mælingar við kvikasilfursmælingar. Og það hlýtur að gilda um hámarkshita líka.

Er hægt að fullyrða t.d. að raunverulegt júlíkuldamet hafi verið sett á Hellu? 

Ath.  Bendi hér á bloggfærslu, þar sem má sjá, í fylgiskjalinu, mesta og minnsta hita sem mælst hefur í hverjum mánuði á mönnuðum íslenskum veðurstöðvum og auk þess úrkomu og snjódýpt.

 

 

Athugasemdir

[Sigurgeir Orri Sigurgeirsson, 25.7.2009 kl. 10:42]

Og ég sem batt svo miklar vonir við hlýnun af mannavöldum.

[Hólmfríður Pétursdóttir, 25.7.2009 kl. 11:45]

Það er kúnst sem þú kannt að skrifa um veður þannig að vanþroska veðurstöðin í heila mínum hafi gagn og gaman að.

Takk fyrir.

[Óðinn af Eyrarbakka, 25.7.2009 kl. 20:23]

Vildi bæta við þessar upplýsingar um frostið á Eyrarbakka sl.nótt að samkv. mínum bókum var minsti hiti í júlí  sem mælst hefur áður á Eyrarbakka þann 15.júlí 1979 þegar lágmarkið var 1,4°C (Líklega miðnæturtaka) og í öðru sæti yfir lágmarkshita í júlí var 8.júlí 1973 og 18. júlí 1983 þegar lágmarkið var 1,5°C (líklega miðnæturtaka). Til samanburðar var hitastigið á miðnætti í dag +3°C. Mælingar á nóttunni hófust árið 2005 með tilkomu sjálvirku stöðvarinnar, svo ekki er víst að hér sé um eindæmi að ræða.

[Jón Kristófer Arnarson, 25.7.2009 kl. 20:30]

Ég bý í Tjarnarbyggð á milli Eyrabakka og Selfoss.  Kartöflugrösin hjá mér kolféllu í nótt.

[Óðinn af Eyrarbakka, 25.7.2009 kl. 20:32]

Ps. Um 300 metrar eru milli mælistöðva á Eyrarbakka og háttar þannig til að gamla stöðin er innan þorpsins í þurru og grónu umhverfi en sú sjálvirka á votlendu bersvæði og skýrir það að mínu viti mismun á mælingum.

[Sigurður Þór Guðjónsson, 25.7.2009 kl. 20:37]

Þetta er alveg rétt hjá þér um lágmarkshitann á Eyrarbakka Óðinn, gamla metið á kvikasilfrinu var 1,4 stig 15. júlí 1979 en ekki 1,5 frá 1983 og leiðréttist hér með. Hitinn í nótt fór niður í 0,5 stig og er því met á staðnum.

[Einar Sveinbjörnsson, 26.7.2009 kl. 00:31]

Fjarlægðin frá mælaskýlinu niður í Eyrarbakkaþorpi frá sjálfvirku stöðinni sem Óðinn segir vera um 300 metrar er einfaldlega of mikil til þess að í raun sé hægt að tala um sömu stöð.  Á Klaustri er sjálfvirk stöð, hún er reyndar handan Skaftár í nokkur hundruð metra fjarlægð frá mælaskýlinu sem reyndar er smámsaman að hverfa inn í skóg og er önnur saga.  Þar kallast sjálfvirkastöðin Stjórnarsandur en ekki Kirkjubæjarklaustur. 

Óhægt er um vik með samanburð, sérstaklega þegar um lágmarkshita er að ræða (líka hámarkshita, þó hann sé ekki alveg jafn hvikull og þegar kalda loftið leggst í bolla) nema þegar hitanemi sjálfvirku stöðvarinnar sé ekki nema í seilingarfjarlægð frá kvikasilfursmælinum.

Ég þekki ekki nægjanlega vel til aðstæðna á Hæli, þó ég hafi nýverið ekið þar hjá. Þá síður á Fáskrúðsfirði, en vel má vera að stöðin þar sé staðsett þannig að hún nemi vel kyrrt og kalt loft næst jörðu. Hitt veit ég hressilegar vindhviður næða um þessa tiltölulega nýja stöð þegar blæs á hásunnan.

[Sigurður Þór Guðjónsson, 26.7.2009 kl. 00:50]

Mér finnst einkennilegt að menn skuli ekki reyna að hafa sjálfvirku stöðvarnar sem næst hinum eins og er í Reykjavík og á Stórhöfða og kannski víðar. Mér finnst þetta líka skrýtið með Stjórnarsand. Stöðin er reyndar alltaf nefnd Kirkjubæjarklaustur og þegar hámarks-og lágmarksmælingar koma inn á listum á vef Veðursstofunnar er aldrei gerður nafnlegur greinarmunur á þessum tveim stöðvum og heldur ekki á stöðvunum á Reykjum í Hrútafirði. Maður veit aldrei um hvora stöð er að ræða, þær mönnuðu eða sjálfvikru, nema gá. Allar aðrar sjálfvirkar stöðvar eru aðgreindar greinilega.  

[Sigurður Þór Guðjónsson, 26.7.2009 kl. 10:34]

Þessir listar sem ég er að tala um eru hámarks-lágmarksmaælingalistar en ekki úrkomulistar.

[Hafdís Hafsteinsdóttir (IP-tala skráð) 26.7.2009 kl. 13:36]

Komdu sæll og takk fyrir skemmtilegar greinar.  Verð að segja að fyrirsögnin var mjög skemmtileg.  Þar sem við maðurinn minn sendum veðurlýsingarnar frá Hæli vildi svo til að við vorum á fæðingardeildinni að eiganast barn. Þess vegna barst veðurskeyti ekki í tíma.  Fyrirsögnin átti því skemmtilega við.  Bestu kveðjur frá okkur á Hæli.  Og við erum alltaf að velta sömu spurningum fyrir okkur

[Sigurður Þór Guðjónsson, 26.7.2009 kl. 23:55]

Til hamingju með barnið! Og mikil upphefð að fá kveðju frá veðurathugunarmönnum.