Metjöfnun í júlíhita í Reykjavík

Hlýjasti júlí sem mælst hafði í Reykjavík hingað til var 1991 en þá mældist  meðalhitinn 13,03 stig.  Er þá miðað við átta athuganir á sólarhring á þriggja klukkustunda fresti. Nú er  júlí  2010 lokið og  meðalhitinn reynist eftir sams konar reikningi vera 13,03 stig! 

Það eru annars  nokkur tíðindi veðurfarslega í Reykjavík  að á eftir hlýjasta júní komi hlýjasti júlí. 

Í fylgiskjalinu er hægt að sjá hitann  í bænum  eins og hann hefur verið á þriggja tíma fresti allan mánuðinn, ásamt hámarks -og lágmarkshita þar sem reynt er  að skipta  um miðnætti en ekki kl. 18. Þessar tölur eru teknar af Gagnatorginu. Dagsmeðaltal hvers dags 1961-1990 er þarna líka. Vel sést að allir dagar hafa verið yfir meðallagi.  Einnig sést sólskin hvers dags og sú úrkoma sem mælst hefur  kl. 9  að morgni. Auk þess  er þarna hitinn á miðnætti og á hádegi yfir Keflavík í 850 hPa og 500 hPa hæðum (um 1400-1500 m og um 5,5, km). Langtímameðalhitinn þarna uppi í júlí er um 3 stig og -20 stig. Þá sést svokölluð þykkt milli yfirborðs og 500 hPa flatarins  í dekametrum. Því  meiri sem hún er því betri skilyrði eru fyrir hlýindum en ekki er alltaf víst að það nýtist til hins ýtrasta við jörð. Loks er  hámarks-og lágmarkshiti hvers dags á landinu á láglendi eða í byggð.  En Hveravellir fá þó að vera með ef þar varð einhvern tíma kaldast, svona  upp á gamlar minningar.

Undarlegur er maður. Þegar ég sá þokuna í nótt vissi ég að þessi júlí myndi ekki setja neitt afgerandi met. Og þá missti ég eiginlega áhugann fyrir honum og varð fyrir vonbrigðum, fannst þetta leiðinlegur og ómerkilegur júlí í alla staði. Hefði metið  aldrei verið innan seilingar,  hitinn undir lokin verið t.d. kringum 12,5 stig hefði maður verið fyllilega sáttur og ánægður með frábæran júlí.

En mánuðurinn klúðraði sem sagt öllu á lokasprettinum ekki síður en strákararnir okkar gera svo ansi oft. 

Ekki kemur nú annað til mála en að reka veðurþjálfaran samstundis með skömm! 

Hér er gömul bloggfærsla þar sem í fylgiskjali má sjá aðra hlýjustu júlímánuði í Reykjavík. Reyndar vantar þar júlí í fyrra.

Smávægilegar villur í innslætti í fylgiskjalinu hafa nú verið leiréttar.  

Skrár tengdar þessari bloggfærslu:

• rv_2010_7_1_0.xls

Athugasemdir

[Áskell Örn Kárason (IP-tala skráð) 30.7.2010 kl. 10:08]

Gaman að þessu. Það er ekki ofsögum sagt að óvenjulega góðviðrasamt hefur verið í Reykjavík síðustu ár. Fátt heyrist af láréttri rigningu og rosa. Við norðlendingar samfögnum reykvíkingum vitandi að þegar allt kemur til alls er ekkert sem jafnast á við raunverulega norðlenska blíðu.

[Halldór Egill Guðnason, 30.7.2010 kl. 18:59]

Vil benda á að í Mosfellsbænum er einnig gott að vera og hér er fylgst með hitatölum af meiri spenningi en heimsmeistarasparkinu í Afríku. Get ekki betur séð en metið falli, ef fer sem horfir yfir helgina.

[Emil Hannes Valgeirsson, 30.7.2010 kl. 20:20]

Nú er um að gera að halda sig þar sem atburðirnir gerast.

[Sigurbjörn Sveinsson, 30.7.2010 kl. 21:22]

Þið Mali og Ingólfur A. kunnið svo sannarlega að velja ykkur bústað.

[Valur Norðdahl (IP-tala skráð) 1.8.2010 kl. 13:40]

Já hann marði það blessaður, og núna bíðum við bara eftir 14 stiga júlí.

En ég var eins og þú orðin svartsýnn í gær þegar þokuskömmin dró metið niður en það hafðist þó.

Ekkert heyrist samt enn frá Veðurstofunni, þar eru menn ekki að flýta sér um of.

En takk fyrir frábært veðurblogg Sigurður, ég fylgist alltaf spenntur með öllum veðra öfgum í flestum löndum, er langtum skemmtilegra en allt Íþróttaspriklið sem ríður stundum ýmsum miðlum á slig.

Núna er td, um 40 stiga hiti í Rússíá og um 44 stiga hiti á Sýrlandi,

 og 13 stig í Scoresbysundi , semsagt allt að gerast í veðrinu.

En er á leiðinni uppá Keili að taka veðrið.

Kveðja;Valur.