Þessi dagur árið 1948

Þennan dag árið 1948 mældist mesti hiti sem komið hefur á Íslandi í mars á mannaðri veðurstöð. Á Sandi í Aðaldal mældust þá 18,3 stig.Mjög hlýtt loft var yfir landinu þennan dag og daginn eftir. Voru þá ótrúlega víða sett hitamet fyrir mars sem enn standa. 

Hinn 27. kl.  14 að íslenskum miðtíma var austsuðaustan stinningskaldi í Reykjavik og minna en hálf skýjað og  hiti 14,0 stig og hefur hámarkshitinn líklega komið um það leyti en kl. 17 var hitinn 11,8 stig. Sól mældist í 2,9 stundir. Næsta dag fór hámarkið í 12,4 stig. Veðurlag var þá svipað en heldur meiri sól, 6,1 klukkustund.   

Metið á Sandi hlýtur að standa sem Íslandsmet fyrir marsmánuð þó 18,8, stig hafi mælst á sjálfvirku stöðinni á Eskifirði þ. 28. árið 2002 og 18,4 stig á sjálfvirka mælinum á Daltanga 31. mars 2007.  Í mars 1948 voru auðvitað engar sjálfvirkar stöðvar.

Á Íslandskortinu eru þau marshitamet sem enn standa frá þ. 27. 1948 merkt með rauðu en þau met sem sett voru þ. 28. og standa enn með bláu. Auk þess er merkt með grænu hámarkshiti mánaðarins sem féll á  þ. 27. á þremur stöðvum sem þó eru ekki nein met. Örfáum hámarksmælingum sem hvorki féllu á þann 27. eða 28. eða eru met á viðkomandi stöð er sleppt. Hins vegar er þarna metið frá Grímsstöðum á Fjöllum sem reyndar kom þ. 4. sem líka var mjög hlýr dagur og þá mældust 15,5 stig í Fagradal í Vopnafirði. Stöðin rétt sunnan við Reykjavík er Víðistaðir við Hafnarfjörð þar sem athugað var í næstum 30 ár. Mætti vel setja upp sjálfvirka veðurstöð í þessum fjölmenna bæ.

Þá er einnig kort sem sýnir hæð 500 hPa flatarins og loftþrýsting við jörð að kvöldi hins 27. og annað sem sýnir hita í 1400-1500 metra hæð.  Gaman er að sjá kuldann í Austur-Evrópu sem teygir sig suður um Balkanskagann og svo hitann yfir Íslandi. Ekki eru tiltæk nein veðurkort frá landinu sjálfu þessa daga.

Mars 1948 var merkilegur fyrir fleira en methita. Hann er einn allra úrkomumesti mars sem mælst hefur og þá komu fræg flóð í Ölfusá. 

Það væri nú ekki amalegt að fá svona marsdag. Hvar eru eiginlega þessi meintu gróðurhúsaáhrif? (Djók). 

 

 

 

 

 

 

 

 

 

 

 

 

 

 

 

 

 

 

 

 

Athugasemdir

[Halldór Egill Guðnason, 28.3.2011 kl. 05:01]

Gróðurhúsaáhrif? Eins og hvert annað bla bla bla. Mars í fyrra og vorið var eiginlega farið. Komið hálfgert sumar, ef ég man rétt. Ef ekki, er það ekkert nýtt. Altso að ég muni ekki neitt. Sá í dag kolsvartan þröst með breitt stél og heiðgulan gogg, hér í Mosó. Aldrei séð þennan fugl áður, en einnig viss um að hann hefur heldur ekki séð mig áður, svo við erum nokkurn veginn kvitt. Að snjórinn sé farinn sunnan heiða þetta vorið...........ó nó. Það er að minnsta kosti ein, ef ekki tvær skvettur eftir fram að páskum. Hilsen og kærar þakkir fyrir stórgóð veðurblogg, Sigurður. Átt heiður skilinn.

[Sveinn Atli Gunnarsson, 28.3.2011 kl. 09:13]

Halldór, gróðurhúsaáhrif eru ekki sönnuð eða afsönnuð með einstökum veðurmetum á Íslandi. Það þarf að skoða gögnin í heild. Eðlisfræði gróðurhúsalofttegunda er nokkuð vel þekkt og aukningin er staðreynd, svo og hækkandi meðalhitastig á heimsvísu.

Hitt er svo annað mál að Sigurður á heiður skilið fyrir þessa skilmerkilegu síðu, sem einnig er krydduð smá húmor... Takk fyrir mig.

[Sigurður Þór Guðjónsson, 28.3.2011 kl. 12:12]

Með vorkveðjum