Dagshitamet í Reykjavík

Meðalhitinn í Reykjavík í dag var 14,9 stig og hefur ekki verið hærri þennan dag síðan mælingar hófust. Næst hlýjastur var 15. júlí árið 1944, 14,4 stig. Þetta segir kannski ekki afskaplega mikið því hlýrri dagar hafa komið all nokkrir um þetta leyti (og reyndar líka í júní) þó ekki hafi þeir fallið nákvæmlega á þessa dagsetningu. Tilviljun á stóran þátt í því hve nær hlýjustu dagarnir koma. Það er samt gaman og eiginlega óvænt að þessi dagur skuli hafa krækt í dagshitamet fyrir Reykjavik að meðalhita.  Í rauninni eru engin sérstök hlýindi yfir landinu. 

Hámarkshitinn í dag var 18,8 stig eftir mælingu kl. 18 en hefur kannski stigið enn meira eftir það en það kemur í ljós í fyrramálið.

Við erum nú alveg um það bil að koma að hlýjasta tíma ársins að meðaltali. Besti kafli sumarsins á að vera eftir ef allt gengur vel. Meðalhitinn í Reykjavík er á góðu róli, 1,9 stig yfir meðallagi það sem af er mánaðar og enginn dagur hefur verið fyrir neðan meðalagið. Það hefur reyndar enginn dagur verið nema einn frá 11. júní. Á Akureyri er meðalhitinn það sem af er júlí heilu stigi yfir meðallagi þó þar hafi ekki allir dagar verið sérlega hlýir en heldur ekki kaldir. Kuldaskeiðinu sem þar ríkti og víðast hvar á landinu í júní lauk fyrsta júlí. Samt er jafnvel enn talað af sumum eins og sé kalt sumar. 

Austast á landinu, alveg frá suðausturlandinu og norður eftir, er hiti reyndar undir meðallagi en ekki hægt að tala um neina kulda. Tiltölulega hlýjast er kannski á Vestfjörðum.

Kuldaskeiðinu vorið og snemmsumars 2011 er einfaldlega lokið hvað sem síðar verður.

Mjög þurrt er víðast hvar. Sums staðar hefur fallið minna en einn millietri þegar mánuðurinn er  nær hálfnaður, svo sem við Eyjafjörð. 

Menn geta svo skoðað þessa hásumarsdýrð í hinu sjóðheita fylgiskjali.  

Skrár tengdar þessari bloggfærslu:

• akrv_2011_43_0.xls

Athugasemdir

[Emil Hannes Valgeirsson, 21.7.2011 kl. 19:55]

Hvað varð um köldustu júlímánaðayfirlitið? Var ekki eitthvað svoleiðis um daginn?

[Sigurður Þór Guðjónsson, 21.7.2011 kl. 22:21]

Á eftir að ganga frá algjörum smáatriðum sem ég nenni ekki vegna góðviðris en nú er ótíð í vændum sunnanlands svo það hlýtur að fara að koma inn.

[Kama Sutra, 22.7.2011 kl. 00:19]

Og fleiri myndir af Mala, takk!

[Sigurður Þór Guðjónsson, 23.7.2011 kl. 18:01]

Þú verður að bíða þangað til hann á stórafmæli, þegar hann verður hvorki meira né minna en fimm ára,  ef hann þá deyr ekki áður, því þeir deyja ungir sem guðirnir elska mjög mikið.