Djönkliðið

Íslendingar telja sér trú um að þeir séu fleygir og færir á ensku. En þetta er bara hvimleið goðsögn. Að vera fleygur og fær í einhverju tungumáli er að geta skilið það, talað það, skrifað það og hugsa á því af svipaðri leikni og á móðurmáli sínu. Íslendingar ofmeta enskukunnáttu sína gríðarlega. Verst er þó skriðdýrshátturinn gegn henni.

Stórfyrirtæki með ægilega ríkum forstjórum eru meira og minna farin að gefa tóninn fyrir þjóðlífið og hafa gríðarleg ítök. Litið er upp til ríka fólksins eins og kóngafólks fyrri tíma. Og nú vilja auðmennirnir leggja niður íslenskuna í reynd og hafa þegar gert það í þeim fyrirtækjum þar sem þeir ráða mestu.

Ekki tókst Dönum að gera út af við íslenskuna í margar aldir. Ekki heldur enskum áhrifum í formi myndmiðla eins og kvikmynda og sjónvarps. En ríkustu mönnum landsins, sem eru orðnir svo ríkir að við skiljum það ekki fremur en mergð stjarnanna, mun eflaust takast að gera út af við íslenskuna á örfáum áratugum vegna tröllataks þeirra á þjóðlífinu í valdi peninganna. Í staðinn kemur útþynnt og meira og minna bjöguð enska. 

Þá verður úti um æðri hugsun í landinu. Við hugsum að miklu leyti með tungumálinu. Ef tungumálið er í rústum verður hugsunin líka í rústum. Hún verður bara djönk. Peningaveldið mun breyta íslenskri menningu í algjört djönk. Og fara létt með það! Mörgum mun þó standa nákvæmlega á sama því við lifum nú á öld peninganna en ekki til dæmis öld  endurreisnarinnar eða öld upplýsingarinnar. 

Við lifum á öld djönksins.

Það má því segja að mesta ógnin sem steðjar að þjóðinni sé ekki dóp og glæpir heldur þessi auðmannastétt sem risið heftur upp á seinni árum eins og gorkúlur á haugi.

Djönkliðið.

Athugasemdir

[María Kristjánsdóttir, 19.9.2007 kl. 13:47]

Ég hef verið að velta því fyrir mér hvers konar spilaborgir þetta séu sem þessir menn margir hafa verið að byggja. Því eftir því sem ég kemst næst eru Bandaríkin risi sem stendur á brauðfótum, Kína ku víst geta einfaldlega geta tekið þau í heilu lagi upp í skuld. Auk þess sem Kína hefur verið iðið við undanfarin áratug að fjárfesta í Rómönsku Ameríku og Afríku. Væri ekki skynsamlegra fyrir þessa menn að taka upp kínversku en ekki ensku í stofnunum sínum?-svona uppá framtíðina!

[María Kristjánsdóttir, 19.9.2007 kl. 13:48]

 eitthvað auka"geta" var að hoppa ínní eina línuna- afsakaðu.

[Auðólfur Örvarsson (IP-tala skráð) 19.9.2007 kl. 14:18]

Já, mikill er máttur peninganna.  Ég verð bara að segja að auðsdýrkunin hér á landi er slík, að það er varla hægt að koma orðum að því.

Almúginn gengst svo upp í þessu, að hann þorir ekki að gagnrýna þetta fólk né gjörðir þess - almúginn segir bara vaaaááááááá! yfir nýjustu afrekum auðfólksins í lífinu og á skemmtunum með hinu snjóþotuliðinu. 

Það er orðinn til heill iðnaður í kringum þetta lið til að lýsa lífi þessarar svokallaðrar auðstéttar, t.d. blaðið Séð og heyrt, en umfjöllun þessa blaðs um hið svokallaða ríka fólk lætur bara venjulegu fólki líða illa.  Dæmi um þetta; "Góður pabbi - Jón Ásgeir kaupir lúxusíbúð handa 16 ára dóttur sinni" - (eru þá allir hinir pabbarnir sem ekki geta gert slíkt hið sama fyrir sín börn, ekki góðir pabbar?) - sjúkt!

Þetta er orðinn þvílíkur hégómi, að þetta á eftir að fara með þjóðfélagið til glötunar.

[halkatla, 19.9.2007 kl. 14:34]

úff ég er því miður sammála

[Ibba Sig. (IP-tala skráð) 19.9.2007 kl. 15:08]

Gaman að þú skulir skrifa um þetta mál á þessum nótum. Mér varð hugsað til hins dýpri þankagangs þegar ég heyrði fréttina en eins og þú segir byggir hann á tungumálinu. En þegar krónur og aurar eru upphaf og endir alls er ekki við góðu að búast. 

Or what? 

[Heiða B. Heiðars, 19.9.2007 kl. 15:09]

Vá! Ég er búin að vera svo upptekin...amk haldið að ég væri það, að ég hef ekki neinn tíma til að þvælast á milli bloggvina. Og þú Sigurður ert búinn að skrifa hverja snilldarfærsluna á fætur annari!! Færslur þar sem ég hefði verið svo hrikalega sammála í kommentakerfunum að við hefðum ábyggilega náð að hrista upp í nokkrum lögreglumönnum, lögfræðingum...tja prestum kannski líka! :)

[Þorkell Sigurjónsson, 19.9.2007 kl. 15:34]

Til varnar Djönkliðinu:
Þegar einhver sannur snillingur birtist á leiksviði lífsins er hann ætíð auðþekktur á því, að allir beinasnar öfunda hann og gera samsæri gegn honum.

[Katrín Snæhólm Baldursdóttir, 19.9.2007 kl. 15:36]

Oh ég má bara ekki til þess hugsa að móðurmálið verði keypt fyrir nokkrar krónur...eða eigum við að segja fórnað fyrir fé?? Þessi þjóð verður þá yfirborðskennd og innantóm, heimsk og visin í hugsun. Tungumálið og skilningurinn og það að koma á framfæri hugsun skiptir öllu máli. Sigurður þú og Mali rokkið!!!

[Sigurður Þór Guðjónsson, 19.9.2007 kl. 18:50]

Je, ræt!

[Jón Steinar Ragnarsson, 19.9.2007 kl. 20:17]

Íslenskan hefur staðið af sér stærri sjói.  Þeir verða allir komnir á eyrina þessir drengir áður en þeir ná að gera neinu mein, nema að vera skyldi eigin málvitund.

Það sem ég skil verst í þessari "broken english" væðingu er að Háskóli Íslands skuli vera í farabroddi hennar.  Þar ræða Íslendingar saman á ensku með kjánasvip vitandi upp á sig hallærislegheitin.