Meðalhitinn er nú 8.2 stig

Nú er maímánuður hálfnaður og reikna ég meðalhitann 8,2 stig í Reykjavík. Það er 2.8 stigum fyrir ofan meðallag og hafa fáir maímánuðir gert það eins gott þegar þeir eru hálfnaðir. Hins vegar hefur kólnað síðustu daga. 

Næstu daga verður svipað veður og mun meðalhitinn fremur fara niður en upp. Það veltur því á síðasta sprettinum hvort þetta verður fyrsti átta stiga maí í Reykjavík síðan 1974 eða ekki. Ef við fengjum reglulega góðan hlýindakafla væri sigurinn í höfn. Slíkir kaflar koma oft seinni hluta maí og mánuðurinn hlýnar að meðalhita reyndar um meira en heilt stig á þeim dögum sem eftir er af árstíðalegum orsökum. Fáum við hins vegar kuldakast með næturfrostum er þetta búið spil.

Það er tiltölulega ekki eins hlýtt fyrir norðan. Hlýindin njóta sín nú best á suðurlandi, frá Skaftafellsýslum og upp í Borgarfjörð. Það er samt ekki kalt annars staðar, nokkuð yfir meðallagi. Annars er það eftirtektarvert að hitinn hefur verið jafn og fremur hár en þó ekki sérstaklega mikill miðað við það sem getur orðið en án allra alvöru kuldakasta. Frostlaust er enn í Reykjavík það sem af er mánaðarins.  

Ég verð að játa sem mjög óþjóðhollur Íslendingur að mér finnst það miklu meira spennandi hvort maí nær 8 stigum í Reykjavík en hvort versta lag í heimi,  This is me life, kemst áfram í júrovísjón, sem ég held að sé alveg útilokað.  Þó þessi keppni sé að vísu mesta lágkúra í heimi þá er hún ekki svo mikil lákúra. 

En átta stiga maí er sko engin lágkúra! 

Og hann ætti að veita hysterískum vitsmunaverunum sem hakka í sig þessa veðursíðu ómælda ánægju! 

Athugasemdir

[Lára Hanna Einarsdóttir, 17.5.2008 kl. 13:24]

Hysterísk vitsmunavera stimplar sig inn en er á þeirri skoðun að þetta júróvisjóndæmi komi þjóðhollustu ekkert við. Þetta snýst um smekkleysi eða smekkvísi og bendi í því sambandi á fínt innlegg Emils í því sambandi.

Annars var nú ansi notalegt þegar hlýnaði um daginn.

[Lára Hanna Einarsdóttir, 17.5.2008 kl. 13:26]

Það er naumast að ég er í sambandi! 

[Sigurður Þór Guðjónsson, 17.5.2008 kl. 13:29]

Ég held að það sé nú alveg á mörkunum að þú sért í sambandi!

[Lára Hanna Einarsdóttir, 17.5.2008 kl. 13:33]

Já, ætli það sé ekki bara alveg rétt hjá þér... 

[Emil Hannes Valgeirsson, 17.5.2008 kl. 21:26]

Veðurblogg með Eurovisionívafi finnst mér vera til fyrirmyndar. Ég er bjartsýnn fyrir hönd maímánaðar, hann á eftir að standa sig með prýði og komast í 8 stiga hópinn og þótt hið íslenska Júróband sé fulltrúi lágkúrunnar þá eru samt talsverðar líkur á að þau nái einnig tilsettum stigum og komist áfram. Allt ákaflega spennandi hvort sem okkur líkar betur eða verr.

[halkatla, 18.5.2008 kl. 03:56]

jú hún, KEPPNIN, er svo mikil lágkúra, só sorrí

eina sem ég get sagt er að ég hef áhyggjur af veðurívafi mínu! 

[Hólmdís Hjartardóttir, 18.5.2008 kl. 11:03]

en er hægt að keppa í veðri???  þar gætum við staðið okkur vel a.m.k. hvað vind varðar.