Beðið eftir storminum

Í nótt fór frostið í Möðrudal á Fjöllum í -21,0 stig í hægum vindi. 

Snjódýptin í Reykjavik er nú fallin niður í 28 sentímetra. Hún er ekki lengur meðal mestu snjódýptar á landinu eins og hún var um tíma en þó sú mesta sem fregnir eru af á öllu sunnanverðu landinu, sunnan Borgarfjarðar.

Mest er snjódýptin núna hins vegar við Skeiðsfossvirkjun í Fljótum, 86 sentímetrar. Á Akureyri er hún 70 sentímetrar. 

Og nú bíðum við eftir storminum ógurlega. Vindhraðinn er kominn upp í 25m/s á Stórhöfða.

 

Skrár tengdar þessari bloggfærslu:

• akrv_2015_42_0.xlsx

Enn bætir í snjóinn í Reykjavík

Snjódýptarmetið í Reykjavík í desember hefur nú enn verið slegið. Snjódýptin var 44 cm í morgun. Það er reyndar meiri snjódýpt í nokkrum mánuði síðan um mánaðarmótin janúar febrúar árið 1952 en þá komst snjódýptin í sama snjóakastinu í 42 cm þann 31. janúar og í 48 cm 1.og 2. febrúar. Mest hefur snjódýptin í Reykjavík mælst 55 cm 18. janúar 1937. Sá snjór stóð þó afar stutt við. Varla gafst ráðrúm til að mæla hann!    

Snjórinn í dag er þá sá þriðji mesti í nokkrum mánuði siðan mælingar hófust fyrir rúmum 90 árum í Reykjvik. 

Ég man vel eftir þessum snjó 1952 sem barn í Laugarneshverfinu. Hann hvarf ekkert strax.

Þetta er sem sagt aftakaástand sem Reykvíkingar geta búist við að upplifa svo sem einu sinni eða tvisvar á ævi sinni. Það hefur því lítið upp á sig að segja: "við búum á Íslandi" eða "svona er Ísland" eins og sumir eru að segja núna í þeirri meiningu að þetta sé svo alvanlagt íslenskt ástand. Það er það nefnilega alls ekki fyrir Reykjavik nema á margra áratuga fresti að meðaltal.  

Við síðasta bloggpistil hér á undan fylgir skjal um snjóalög í Reykjavík frá því Veðurstofan var stofnuð. Þar sést hve Reykjavík er í rauninni snjóléttur staður.

 

Skrár tengdar þessari bloggfærslu:

• akrv_2015_41_0.xlsx

Stopular úrkomu og snjólagspplýsingar

Í nótt mældist frostið á Brúarjökli -23,1 stig. Og er það reyndar mesta frost sem mælst hefur þennan dag á landinu frá því a.m.k. 1949. Gamla metið var -22,7 sem kom á Brú á Jökuldal árið 1973. En þetta segir samt ekki sérlega mikið um mikla kulda í nóvember því þessi dagur er með óvenjulega hátt lágmarksgildi miðað við nóvemberdaga. Þann 23. árið 1996 fór frostið jafnvel í 30,1 stig á sjálfvirku stöðinni á Neslandatanga við Mývatn (og -30,4 daginn eftir). Það er fyrsta dagsetning að vetri sem frost á landinu fer í 30 stig eða meira en fyrsta dagsetning fyrir 25 stiga frost er 4. nóvember og var það líka árið 1996 og einnig á Neslandatanga. Hér er miðað við frá og með 1949.

Snjódýpt í morgun var mæld 30 cm í Reykjavik. En á Ólafsfirði var hún 50 cm. Hugsanlega hefur snjódýptin þar í gær verið meiri en í Reykjavík sem þá var með mestu snjódýpt á landinu miðað við upplýsingar sem bárust en þann dag komu ekki neinar upplýsingar um snjólag á Ólafsfirði. 

Á Akureyri hefur verið gefin upp alauð jörð frá 23. nóvember en daginn áður var gefin upp snjódýpt uppá 23 sentímetra. Síðan kom allmikil hláka og má vera að snjólaust hafi orðið um tíma en síðustu tvo daga í frosti allan sólarhringinn hefur úrkoman þar mælst yfir 6 mm. Þar hlýtur því að vera dálítill snjór á jörðu. Athygli var vakin á þessu atriði hér í gær í athugasemd við bloggfærslu dagsins. Það er auðvitað lélegt að ég skuli ekki hafa áttað mig á þessu en það eru ansi mörg atriði sem ég þarf að fylgjast með daglega til að halda úti fylgiskjalinu við þessa bloggsíðu.

Reyndar eru upplýsingar frá ýmsum veðurstöðvum um úrkomu og snjóalög sem koma inn á vef Veðurstofunnar óþolandi stopular og hefur svo lengi verið þó skeytastöðvar séu yfirleitt góðar.Ein stöð gefur kannski einhvern dag upp mestu snjódýpt sem þá mælist á landinu en svo koma bara engar upplýsingar frá henni í marga daga. En þegar þetta gerist gefur vefurinn upp með plúsmerki að engar upplýsingar hafi borist frá viðkomandi stöð. Það er hins vegar nýlunda að stöðvar gefi upp alauða jörð þegar allar líkur benda til að svo sé þó ekki. 

En kannski er þetta liður í þeim breytingum á veðurþjónustu sem Veðurstofan hefur tilkynnt á heimasíðu sinni með talsverðum tilþrifum!

Viðbót: Úrkoman í dag frá kl. 9-18 á Akureyri var 8,8 mm í frosti og hvergi meiri á landinu. Nú verður spnanndi að sjá hvort þar verði enn alauð jörð í fyrramálið!

Viðbót 30.11.: Snjódýpt á Akureyri í morgun var 33 cm. 

 

 

Skrár tengdar þessari bloggfærslu:

• akrv_2015_40_0.xlsx

Næst mest snjódýpt í nóvember í Reykjavík

Í morgun mældist snjódýptin í Reykjavik 32 sentímetrar. Það er þá næst mesta snjódýpt sem þar hefur mælst í nóvember frá því Veðurstofan byrjaði að mæla hana. Metið er 38 sentímetrar frá 24.nóvember 1978. Úrkoman í morgun mældist 20,6 mm og 12,3 mm í fyrradag eða 33 mm á tveimur sólarhringum. Láta mun nærri að 1 mm af úrkomu jafngildi einum sentímetra af snjó. 

Eins og í gær er snjódýptin í Reykjavik sú mesta á landinu sem fregnir eru af. Það er sjaldgæft.

Það er samt öðru nær en að sérstakt fannfergi sé nú á landinu. Hvergi er mikill snjór nema þá í höfuðborginni ef menn vilja kalla það svo og ekki er alls staðar alhvít jörð  og sums staðar er alveg snjólaust, einkum á suðaustanverðu landinu, en einnig í Bolungarvík og á Akureyri. 

Mest snjódýpt í nokkrum mánuði í Reykjavík er 55 cm 18.janúar 1937. En sú mesta á landinu 279 cm við Skeiðsfossvirkjun í Fljótum 19.mars 1995.

Skrár tengdar þessari bloggfærslu:

• akrv_2015_39_0.xlsx

Mestur snjór á landinu í Reykjavík

Í morgun var jörð alhvít í fyrsta sinn á þessu hausti í Reykjavík. Og það munar aldeilis um það. Snjódýptin var mæld 21 cm sem er sú mesta á landinu ásamt Ólafsfirði. En Ólafsfjörður er snjóasveit en Reykjavik er snjóléttur staður og þar er sárasjaldan mestur snjór á öllu landinu einhvern dag.

Síðast var alhvítt í höfuðborginni í vor 11. apríl og hefur því verið snjólaust í 228 daga. Það er 24 dögum lengur en meðaltal þessarar aldar og 28 dögum lengur en meðaltalið frá og með 1949. Flestir hafa þessir dagar verið 248 árið 2000 en þá varð jörð alhvít 12. desember og hefur aldrei orðið alhvítt svo seint á hausti í Reykjavik. Fæstir hafa snjólausu dagarnir frá vori til hausts verið 144 árið 1990. Snjólausir dagar í Reykjavík milli vors og hausts hafa reyndar ekki verið fleiri en nú síðan dagafjöldametið var sett árið 2000.

Þetta er mesta snjódýpt í nóvember í Reykjavík síðan 7. nóvember 1993 þegar snjóýptin var jafnmikil, en meiri 1979 (29 cm), 1978 (38 cm) og 1930 (26 cm). Snjódýptin núna er því sú fjórða til fimmta mesta í Reykjavík frá því Veðurstofan var stofnuð árið 1920.   

Meðalhitinn á landinu er enn meira en eitt stig yfir meðallagi. En nú fer að halla undan fæti með kuldakasti til mánaðarloka.   

 

Skrár tengdar þessari bloggfærslu:

• akrv_2015_38_0.xlsx

Skólabókardæmi um blíðviðri og ekki blíðviðri að vetri

Menn hafa verið að lofa kuldann sem var í gær og fyrradag, meira að segja veðurfræðingar í sjónvarpinu, og kallað það fallegt vetrarveður og jafnvel "veðurblíðu". En í dag er bjart og stillt veður í Reykjavík og kominn 4 stiga hiti. Það er bara veður í allt öðrum og betri gæðaflokki en kuldinn sem var en samt er auðvitað sami veturinn.

Enginn er þó að lofa sérstaklega þetta (alvöru) góðviðri að vetrarlagi en menn virðast alveg óskaplega veikir fyrir mjög köldum dögum. Þá er gjarnan talað um "veðurblíðu" fyrir nú utan alla fegurðina sem menn lofa þá hástöfum.

Með allri virðingu blæs ég á þennan veðursmekk! Þetta er einfaldlega vondur veðursmekkur!

Svona eins og að taka Justin Bieber fram yfir Bítlana.

Þessi veðurbreyting sem nú hefur orðið er reyndar alveg skólabókadæmi um þann mun sem getur verið á vetrarveðri sem út um glugga virðist þó vera svipað. En það er alveg furðulegt að alltaf hlaupa menn upp og tala um "veðurblíðu" þegar kuldinn ríkir en eins og þeir skynji bara ekki hvað veður eins og er í dag er honum mikla æðra og betra!

Ég hef áður vikið að þessu atriði hér á blogginu, hvað mönnum sé tamt að tíunda vetrarkulda sem veðurblíðu en láti sér fátt um finnast þegar svo alvöru blíða kemur að vetrarlagi.

En nú kom einstaklega gott tækifæri til að árétta hvað ég á við.

Skrár tengdar þessari bloggfærslu:

• akrv_2015_37_0.xlsx

Úrkomumesti mánuður á veðurstöð á landinu

Nóvember árið 2002 var ekkert venjulegur mánuður hvað veðurfar snertir á landinu. Mánaðarúrkoman á Kollaleiru í Reyðarfirði mældist þá 971,5 mm sem féll á 25 úrkomudögum. Það er mesta úrkoma sem fallið hefur á einum mánuði á íslenskri veðurstöð. Úrkoman á Hánefsstöðum í Seyðisfirði var svo 907, 9 mm, í Neskaupstað 784,9 mm, á Desjamýri í Borgarfirði eystra 736,2 mm, á Höfn í Hornafirði 672,4 mm og á Gilsá í Breiðdal 656,4 mm.

Til að gera sér einhverja hugmynd um það hve gríðarlegt magn þetta er sem mældist á Kollaleiru má geta þess að meðalárskoma í Reykjavík á þessari öld er 874 mm. Og úrkoman á Kollaleiru þennan mánuð er reyndar meiri en nokkru sinni hefur fallið á heilu ári á sumum veðurstöðvum sem athugað hafa í marga áratugi,svo sem í Æðey, Hrútafirði, Blönduósi, Skagafirði, við Mývatn og á Hólsfjöllum en allt eru þetta reyndar staðir þar sem úrkoma mælist lítil. En fyrr má nú samt vera! 

Þessi gríðarlega úrkoma var aðallega bundin við austurland en á öllu vestanverðu landinu var úrkoman minni en í meðallagi en allra minnst á Stafni í Svartárdal, aðeins 3,1 mm.

Mesta sólarhringsúrkoma var ekkert óskaplega mikil miðað við það sem hún hefur mest orðið, 169,9 mm á Neskaupstað þann 17. En á austurlandi komu margir dagar með stórrigningu þó allsherjar met hafi ekki verið slegin.

Ástæðan fyrir þessari miklu úrkomu austanlands voru mjög eindregnar austanáttir. Og ekki á neinn venjulegan hátt eindregnar heldur var þetta einfaldlega mesti austanáttamánuður allra tíma. 

Þetta var hlýr mánuður. Alls staðar var meðalhitinn yfir frostmarki í byggð. Víða var snjólaust og hvergi var mikill snjór. Þó voru 6 dagar alhvítir á Kollaleiru og með því meira á landinu. Meðalhitinn í Reykjavík var 4,7 stig en 4,2 á Kollaleiru. Hlýjast var 6,5 stig í Vík í Mýrdal. Hæsti hiti mánaðarins var ekki sérstaklega hár miðað við hvað landsmeðalhitinn var mikil, 13,6 stig. Í hinni miklu austanátt fór lítið fyrr sunnan og suðvestanáttum sem koma með mestan vetrarhita. Hámarkshiti mánaðarins mældist svo á vægast sagt óvenjulegum stað þegar um nóvember er að ræða sem einnig má kannski þakka austlægu áttunum, nefnilega á Lambavatni á Rauðasandi, allra vestast á landinu.

Skrár tengdar þessari bloggfærslu:

• akrv_2015_36_0.xlsx

Hlýtt og blautt

Meðalhitinn það sem af er mánaðarins í Reykjavík er nú 4,9 stig eða 2,6 yfir meðallaginu 1961-1990 en 1,5  stig yfir meðallagi þessarar aldar. Á Akureyri er meðalhitinn 3,1 og er það 2,5 stigum yfir meðallaginu 1961-1990. Landsmeðalhita má lauslega áætla 2,2 stig yfir meðallagi þessarar aldar. 

Enn er mikið eftir af mánuðinum og kólnandi veður framundan. Þetta segir þvi ekki neitt um meðalhitann í mánaðarlok þó forskotið sé nokkuð.

Úrkoman í Reykjavík þessa fyrstu tólf daga er þegar kominn tæpa 3 mm yfir meðalúrkomu alls nóvembermánaðar árin 1961-1990. Hlutfallslega hefur mest úrkoma verið á suðvesturlandi. Mestu munar um úrkomuna í Reykjavík þann sjötta sem var 23 mm og þann ellefta en þá var hún 11,5 mm. Rignt hefur eitthvað alla daga mánaðarins. Reyndar hefur úrkoman verið mest síðla kvölds og að næturlagi. Aldrei hefur rignt meira en 5,7 mm frá klukkan 9-18 og var það þann 5. en aðra daga á þeim tíma hefur úrkoman aldrei náð tveimur millimetrum. 

Á Akureyri er úrkoma innan við 5 mm og svipað á sjálfvirku úrkomustöðinni á Möðruvöllum í Hörgárdal.

Að kvöldi hins fimmta fór hitinn í Reykjavík í 11,0 stig en eftir reglum Veðurstofunnar verður sá hiti bókfærður til þess sjötta og er þá jafn mesta hiti sem mælst hefur þann dag í borginni frá a.m.k. 1948, ásamt 6. nóvember 2007, en ef miðað er við þann fimmta er hann mesti hiti sem mælst hefur þann dag sömu ár. Þrettán stiga hiti hefur reyndar mælst seint í nóvember í Reykjavík og tólf stig tvo daga í desember, sá síðari svo seint sem 14. desember 1997.

Snjólaust má heita í byggð. Hvergi er alhvít jörð en lítillega flekkótt í Svarfaðardal, Svartárkoti, Vopnafirði og Borgarfirði eystra. Ekki er hægt að segja að veturinn hafi enn komið yfir landið. En auðvitað kemur að því.

Og í þessum skrifuðu orðum byrjaði að snjóa í Reykajvik og er jörð að verða hvít! 

Skrár tengdar þessari bloggfærslu:

• akrv_2015_35_0.xlsx

Hlýjasti dagur mánaðarins var í gær

Í gær var hlýjasti dagur mánaðarins. Landsmeðalhiti var 8,7 stig.

Í Reykjavík var sólarhringsmeðaltalið það hæsta síðan a.m.k. 1948 eða 9,4 stig og hámarkshitinn, 12,1 stig, var einnig sá mesti á sama tíma. Og sólin skein í hálfa þriðju klukkustund.

Ekki að furða þó David Cameroon hafi verið með flakandi um hálsinn í sjónvarpsviðtali niður við gömlu Reykjavíkurhöfn!

Meðalhiti mánaðarins er nú orðinn meiri í Reykjavík en á Akureyri en lengi framan af var því öfugt farið. Enn er þó hlýjast á austurlandi.

Og mánaðarhitinn ætlar að verða vel yfir meðallagi á landinu, gömlum jafnt sem nýjum.

Skrár tengdar þessari bloggfærslu:

• akrv_2015_34_0.xlsx

Fyrsta haustfrost í Reykjavík

Í gærkvöldi um áttaleytið fór að frjósa í Reykjavík og varð frostið i nótt mest -3,8 stig. Ef við dagsetjum frostið í dag, 26. október, til sæmræmis við mælihætti Veðurstofuunnar hefur frostlausi tíminn verið 166 dagar en meðaltalið á þessari öld er 149 dagar. Síðast fraus í vor 12. maí í Reykjavik.

Meðalhitinn á Akureyri í gær var undir frostmarki, -1,1, stig, i fyrsta sinn síðan 8. maí. Dagurinn í dag mun einnig verða undir frostmarki að meðalhita í Reykjavík en það gerðist síðast þar 27. apríl. 

Meðalhitnn á landinu fellur auðvitað þessa köldu daga en góðum hlýindum er spáð á miðvikudaginn og svo áfram alveg sæmilegt til mánaðarloka. Oktober mun því standa sig nokkuð vel hvað hitann varðar.  

 

Skrár tengdar þessari bloggfærslu:

• akrv_2015_32_0.xlsx