Röng frostmæling í Reykjavik?

Lágmarkshiti var 19,4 stig í Reykjavík á kvikasilfursmæli Veðurstofunnar á vefsíðu hennar í morgun. Sé þetta rétt mæling er það næst mesta frost í borginni eftir 1918.

En ég efast mjög um þessa mælingu. Á sjálfvirka mælinum og líka á búveðurstöðunni var frostið bara -14.4 stig og -14.8° á Reykjavíkurflugvelli. Hins vegar um -16 í Garðabæ. 

Þetta gengur varla upp. Átti þarna kannski að standa -14,9 stig í Reykjavík?

Það er bölvanlegt að það skuli vera óvissa um þetta einmitt þegar almennilegt kuldakast er að skella á.

Sé mælingin samt rétt hvernig skyldi þá standa á þessum mikla mun á kvikasilfursmælinum og öllum sjálfvirku mælunum á Reykjavíkursvæðinu, þar af tveimur á sama túni og kvikasilfursmælirinn? 

Vel á minnst: Það er nú ekkert sérlega langt frá síðasta kuldakasti.  

Athugasemdir

[Jenný Anna Baldursdóttir, 2.2.2008 kl. 10:09]

Góðan daginn Sigurður.  Miðað við hvrsu helv... kallt mér er, dúðuð í fleiri lög að fötum inni í þokkalega heitri íbúð, þá trúi ég heitt og innilega að það sé kaldara en mælirinn segir til um. BRRRRRRRRRRRRRRRRR

[Jón Steinar Ragnarsson, 2.2.2008 kl. 10:11]

Svo er spurningin: Ef mælingar eru svo misvísandi árið 2008, hversu áræðanlegar voru þær árið 1918?

[Emil Hannes Valgeirsson, 2.2.2008 kl. 11:51]

Tók eftir þessu einnig og fór á síðuna þína til að athuga hvað þú segðir um þetta. Getur verið að krókloppin veðurathugunarmaður hafi handskrifað töluna 14 og hún litið út sem talan 19 hjá þeim sem tók við? Eða eru svona færslur kannski ekki handskrifaðar lengur? Þetta verður náttúrulega að vera rétt, bæði á svona merkisdögum sem og öðrum. Aldeilis varstu annars flottur í Fréttablaðinu.

[Sigurður Þór Guðjónsson, 2.2.2008 kl. 13:12]

Mælingarnar 1918 hafa verið metnar og fengið blessun. Þessi mæling verður líka metin og fær blessun eða afskráningu. Annars var ekkert erfiðara að skrá mælinga 1918 en nú og kvikasilfurshitamælarnir voru alveg jafn góðir en umbúnaður þeirra var síðri en nú.