''Meiri líkur en minni''. Blekkjandi orðalag.

Börnin sem voru á Kumbaravogi vilja að forsætisráðuneytið geri aðra skýrslu um starfsemi heimilisins. Þau fella sig ekki við þá sem verið var að leggja fram. Meðal annars eru þau ósátt með orðalagið að ''meiri líkur en minni'' séu fyrir því að börnin hafi orðið fyrir ofbeldi.

Þetta orðalag hefur ekki aðeins verið notað um börnin á Kumbaravogi heldur líka í Heyrnleysingjaskólanum og á Bjargi.

Eftir því sem skýrslunum er lýst er samt alveg ljóst að nokkur fjöldi barna segist hafa orðið fyrir ofbeldi og nefndin telur vitnisburð þeirra trúverðugan.

Það er því engu líkara en orðalag nefndarinnar sé til þess að draga úr hinum óþægilega sannleika: 

ÍSLENSK BÖRN URÐU ÁRUM SAMAN FYRIR LÍKAMLEGU OFBELDI, ÞAR MEÐ TÖLDU KYNFERÐISLEGU, Á OPINBERUM BARNAHEIMILUM. 

Þetta er staðreynd málsins. Og það á ekki að sveipa hana vafavekjandi lögfræðilegu orðalagi  enda  engin málaferli á döfinni þar eð sök einstaklinga er fyrnd. En samfélagslegt uppgjör er mikilvægt. 

En vegna þessa orðalags munu einmitt sumir segja: Ég trúi engu um þetta.

Áríðandi er líka að menn geri sér grein fyrir því að þó sum börn hafi misnotað önnur börn á þessum stofnunum, en það gerði líka starfsfólk sums staðar,  hefði það aldrei gerst ef viðhorfin að ofan, frá forsvarsmönnum heimilanna og jafnvel þjóðfélaginu í heild, hefðu ekki verið full af fjandskap og fyrirlitningu í garð barnanna.

Þeirri fyrirlitningu var vel lýst áðan í sjónvarpsfréttum RÚV þegar börn sem voru á Kumbaravogi höfðu orðið. Þau sögðu að litið hafi verið á þau sem hreina fávita og það kemur fram í bókunum sem enn eru til. Þeim bókunum ætti að gjöreyða.

Það verður fróðlegt að fylgjast með erindi Kumbaravogsbarna við forsætisráðuneytið um nýja skýrslu. 

Ekki verður síður fróðlegt að fylgjast með bótamálunum til Breiðavíkurdrengjanna en merkilegt viðtal var við tvo þeirra á Útvarpi Sögu fyrir skömmu.

 

Athugasemdir

[DoctorE (IP-tala skráð) 12.9.2009 kl. 20:40]

Mofi er á öðru máli, staðurinn algerlega geggjað góður, allir sem segja eitthvað slæmt um hann eru illmenni.
Svona eru trúarbrögðin... hear no evil, see no evil.. ef það er innan trúar.
Sorglegt

[Sigurður Þór Guðjónsson, 12.9.2009 kl. 20:59]

Á síðu Mofa má lesa þetta i athugasemd frá konu sem segist hafa rekið barnaheimili: ''En við sem vinnum svona vinnu erum alveg berskjölduð, við eigum mannorð okkar undir þessum einstaklingum, sem oft á tíðum eru mjög veikir einstaklingar, sem svífast einskis til þess að koma sér undan vistun.''

Það er einmitt þetta viðhorf, þessi stæka fyrirlitning, sem ég er að tala um: ''mjög veikir einstaklingar sem svífast einskis.''

Það má alveg búast við því að svona raddir heyrist núna til að reyna að gera framburð barnanna, sem nú eru orðin fullorðin, tortryggilegan.  

Annars voru víst tvö heimli á Kumbaravogi, annað mikla betra en hitt, skilst mér. 

[DoctorE (IP-tala skráð) 12.9.2009 kl. 21:24]

Þá er um að gera að það rétta komi fram.. strax og farið er að reyna að sverta meint fórnarlömb þá hringja allar aðvörunarbjöllur hjá mér

Þetta með að enginn hafi vitað neitt.. það minnir mig á Breiðavík þar sem prestlingur bjó á staðnum en sagðist aldrei hafa tekið eftir neinu... ég er ekki að segja að hann hafi vitað þetta en mér finnst það mjög ótrúlegt miðað við lýsingarnar sem maður hefur heyrt af staðnum.. .Hotel Hell, hvorki meira né minna