Hafísavor!

Ég spái aftaka hörðu vori með svá miklum hafísum að ganga megi sem á sléttri foldu frá Grímsey til lands og munu iii tigir hvítabjarna verða felldir um allar sveitir en nokkrir birnir munu eta upp menn suma alla.

Hafís eykst á norðurslóðum

Litlir karlar

Það er ekki hægt að segja annað en Páfagarður leggist lágt með því að líkja við gyðingaofsóknir fréttum mjög virtra fjölmiðla sem virðast benda til þess að páfinn hafi hylmd yfir kynferðisbrot gegn börnum. Enda hafa talsmenn gyðinga og fórnarlamba barnakynferðisofbeldis lýst yfir viðbjóði sínum á orðum þessa húsprédikara Páfagarðs.

Sumir hafa fundið að því að menn setji út á kaþólsku kirkjuna vegna misnotkunar presta á börnum. Segja að slík misnotkun sé svo algeng í mannlífinu og barnaníðingar finnist alls staðar, í skólum, barnaheimilum og svo framvegis. En þetta með kaþólsku kirkjuna snýst ekki um einstaklinga endilega heldur afstöðu. Það er leyndin sem virðist hafa verið kerfisbundin, aðgerðaleysið, sem ýmsir yfirmenn kaþólsku kirkjunnar viðhöfðu EFTIR að þeim var ljóst að kynferðismisnotkun var beitt sem hneykslar fólk. Veraldlegar stofnanir hafa ekki kóað eins mikið með brotlegum einstaklingum í sínum röðum.

Kaþólska kirkjan er afar voldug stofnun. Gagnvart henni voru varnarlaus börn sem voru í hennar umsjá. Þetta er því mjög alvarlegt mál frá mörgum sjónarhornum. Ekki nema von að menn hneykslist og það á ekki á nokkurn hátt að bera í bætifláka fyrir kikjuna. En  nú gerist gamla sagan: þolendurnir breytast jafnvel í sökudólga, misgerðarmennirnir, kirkjunnar þjónar og sú stofnun sem kóaði með þeim og gerði þeim fært að halda misnotkuninni áfram, verður að nokkurs konar fórnarlambi.

Það kemur ekki síst vel fram í þessu dæmi um frétt sem bendir til þess að páfinn hafi vitað af kynferðismisnotkun án þess að hafast neitt að. 

 

Gagnrýna samlíkingu í Páfagarði

Páskahret

Hret eru algeng á þeim tíma sem páskarnir geta verið en þeir færast til sem kunnugt er. Þau geta komið hve nær sem er og það er bara tilviljun þegar þau hitta á páskana. Þau koma þeirri hátíð auðvitað ekkert við. Auk þess verða hret, sem kalla má páskahret, að að koma ofan í hlýindi sem staðið hafa í einhverja daga, helst fáeinar vikur, og koma  fáa daga fyrir skírdag í fyrsta lagi en á páskadag í síðasta lagi til að hægt sé að tala um páskahret. Það er ósköp vitlaust að tala um páskahret þó til dæmis falli snjór um páskana þegar kuldahretið hefur þá staðið í marga daga, tala nú ekki um í vikur.

Veðurfræðingurinn í sjónvarpinu í gærkvöldi kallaði snjókomuna í gær í Reykjavík  sannkallað  páskahret. Því er ég ósammála og líka því að hríðin fyrir norðan í dag sé kölluð páskahret.

Ástæðan er einfaldlega sú að kuldarnir, sem komu ofan í góð hlýindi, hafa staðið í marga daga og bætt við snjó fyrir norðan smátt og smátt og sums staðar annars staðar líka. Hretið kom því fyrir nokkrum dögum. Það byrjaði alls ekki í gær eða í dag. Ekki er rétt að kalla framhald og tilbrigði við kuldahret sem staðið hefur dögum saman neitt páskahret. Kuldakastið  hófst 27. mars. Sérlega kalt og norrænt loft hefur verið yfir landinu síðan.

Að minnsta kosti verður að telja að ''páskhretið'' hafi byrjað fyrir meira en viku en sé ekki að byrja í gær eða í dag. 

Flest tal um páskahret yfirleitt er hrein vitleysa, ónákvæmt og út í hött, eins og  vel sést á þessu dæmi, og menn ættu endilega að leggja slíkt tal bara niður.

Afhverju ekki lög á lækna

Læknar eru sí og æ að tala um hvað þeir bera hagsmuni sjúklinga fyrir brjósti.

Það er augljóst að þeir bera ekki hagsmuni sjúklinga fyrir brjósti í þessari deilu. Þeim stendur nákvæmlega á sama um þá þegar þeirra eigin hagsmunir eru í húfi. Sjúklingarnir eiga engan hlut að máli í deilunni. 

Læknarnir segja að nýtt vaktafyrirkomulag ógni öryggi sjúklinga. En það á víst að auka öryggi sjúklinga óskaplega að hlaupa frá þeim í stað þess að semja. Læknarnir eru sjálfir að ógna öryggi sjúklinga en saka svo aðra um það!

Deiluaðilar vísa reyndar ábyrgð hver á annan eins og oft er við svipaðar kringumstæður. Það má því segja að hvorugur þeirra beri hagsmuni sjúklinga fyrir brjósti. Það firrir þó lækna ekki ábyrgð gagnvart sjúklingum. Siðferðileg og fagleg ábyrgð lækna á sjúklingum er alltaf bein. Hún hverfur ekki þó þeir mæti ekki til vinnu. 

Sá skaði sem svona vinnustöðvun getur valdið er ekki á dauðum hlutum. Hún bitnar á lifandi fólki þar sem það er viðkvæmast fyrir, á heilsu þeirra og jafnvel lífi.

Öryggi sjúklinga er augljóslega i hættu þrátt fyrir yfirlýsingar um annað. Hver trúir því að störf 60 lækna séu eiginlega ónauðsynleg, það breyti svo sem engu þó þeir hættu störfum hvað öryggi sjúklinga varðar. Landlæknir og læknaráð hefðu ekki áhyggjur ef öryggi sjúklinga væri ekki einmitt ógnað.

Almenir læknar eru beinlínis að ógna lífi og heilsu sjúklinga. Það liggur hreinlega í augum uppi.

Um daginn átti að setja lög á flugumferðarstjóra. Enginn skaðast á heilsu og lífi þó hann komist ekki í flug. En vinnudeila læknanna núna getur skaðað líf og heilsu sjúklinga. Ekki er hægt að sjá annað en að meira sé í húfi en í verkfalli flugumferðastjóra.

Hvers vegna virðist sú hugmynd ekki einu sinni koma fram að ríkisstjórnin grípi inn í deilu sem ógnar lífi og heilsu fólks úr því hún gerði það í verkfalli flugumferðastjóra? Er það ekki vegna þess að læknar eru svo voldug stétt að menn þora ekki almennilega að ganga beint til verks gegn henni? 

Að lokum ein spurning: Hvernig á sjúklingur að treysta unglækni þegar hann kemur aftur til vinnu eftir að deilan leysist þegar hann veit að læknirinn hljóp nokkrum dögum fyrr frá allri ábyrgð gagnvart honum? 

 

Vísa ávirðingum á bug

Snjóléttur og mildur vetur í Reykjavík

Alltaf hefur mér fundist 1. apríl fyrsti dagur vorsins. Það er þó ekki mildinni fyrir að fara að þessu sinni. Í nótt fór frostið í Reykjavík niður í 8,9 stig en 16,1 á Þingvöllum og 14,4 stig á Staðarhóli í Aðaldal. Meðalhiti gærdagsins var sá minnsti í Reykjavík í öllum marsmánuði og líklega annað hvort kaldasti eða næst kaldasti dagurinn á öllu landinu. Á morgun verður síst betra og má þá jafnvel búast við éljum suðvestanlands. Eftir það á víst að hlýna. Það verður kannski komin þolanlegur hiti á daginn hér syðra á páskadag. Kaldir páskar finnst mér hálfgert ómark því páskarir eru í mínum huga tengdir vorinu. Allra verstir eru þó hvítir páskar á láglendi.

Meðalhiti mars í Reykjavík var 3,1 stig og kólnaði um meira en eitt stig síðustu fimm dagana.

Menn tala um hlýjan vetur. Meðalhiti vetrarins, desember til mars, er í Reykjavík 1,6 stig. Og það er 1,6 stig yfir meðallagi. Talsvert hlýrra var þó veturna 2002-2003 og 2005-2006. Aðrir vetur sem hafa verið hlýrri í Reykjavík eru 1972, 1964, 1963, 1948, 1946, 1942, 1929 og 1923. Veturnir 1954, 1953 og 1934 voru svipaðir að hita og nú. Veturinn núna kemst eftir þessu ekki á topp tíu hlýindalistann. Á öllu landinu sýnist mér hitafrávikið frá meðallagi vera rétt rúmlega eitt stig og eru þá enn fleiri vetur sem hafa verið hlýrri en þessi á landinu öllu en í Reykjavík. 

Mjög lítill snjór var í Reykjavík. Í október var einn dagur alhvítur, enginn í nóvember, 5 í desember, enginn í janúar, þrír í febrúar og í mars kringum fimm dagar. Nokkrir dagar í vetur voru flekkóttir af snjó. En alhvítir dagar frá því í haust hafa einungis verið eitthvað í kringum 14. Þeir hafa aldrei verið færri frá því í september til mars síðan talningar hófust árið 1924. Snjóleysið heyrir því út af fyrir sig til meiri tíðinda en vetrarhlýindin sem slík.

Snjóleysið og mildur vetur þó hann sé ekki með þeim allra hlýjustu er það sem ræður þeirri tilfinningu manna að ''enginn vetur'' hafi verið í Reykjavík að þessu sinni.

Veðrið getur verið duttlungafullt. Gífurlegur hitamunur getur til dæmis verið milli sömu  mánaðardaga eftir árum. Hér fyrir neðan má sjá kort frá hádegi frá hlýjasta og kaldasta 1. apríl sem komið hefur á landinu rúmlega síðustu sextíu árin.

 

 

 

 

 

 

 

 

 

 

 

 

 

 

 

 

 

 

 

 

 

Ég hef frelsast!

Í nótt vitraðist mér sjálfur Jesús Kristur og sagði:

Þú ert nú aumi syndarinn Sigurður! Og sál þín er svört sem bik og hjartað forhert og hart. Eins gott að þú snúir af villu þíns vegar áður en þú sekkur að eilífu í glötunardýpið. Þú ert trúlaus andskoti. En öll nótt er ekki enn úti. Þreifaðu nú á mínu síðusári og  trúðu.

Og ég þreifaði á hans blóðuga síðusári og sjá!

Ég fékk instrant frelsun!

Ó, hans blessaða síðusár hefur frelsað mig frá öllum syndum!

Og síðast en ekki síst frá HELVÍTI og kvölunum.

Kræst! Ég hef frelsast!