Það hefur þegar kólnað

Nú gerist sama sagan og eiginlega alltaf þegar óvenjuleg hlýindi ganga yfir. Þeim lýkur og við tekur bara venjulegt veður í hlýrri kantinum. Í fréttinni segir að muni kólna þegar líður að vikunni. En það hefur þegar kólnað þar sem hlýjast er frá því sem verið hefur síðustu daga. Bara þó nokkuð.

En í þessu nánast venjulega veðri heldur fólk áfram að tala eins og áfram sé eitthvað sérstakt að gerast. 

Það má segja að þetta gerist undantekningarlaust við þessar aðstæður. Reyndar er oft eins menn taki ekki almennilega við sér fyrr en mesta veðurblíðan er liðin hjá en fara þá að lofa venjuleikann fram út öllu hófi. 

Auðvitað er áfram gott veður á suðvesturlandi. En það er hætt að vera einhver sérstök veðurblíða.

Útlitið bjart næstu daga

Allt búið

Í gær varð mesti hiti á landinu 19,5 stig á Þingvöllum. Í nótt fór frostið þar niður í 2,4 stig. Loftið er mjög þurrt. Þetta er dægursveifla upp á 22 stig. Á þessari stundu er 12 stiga hiti á Þingvöllum.

Hitinn á landinu er reyndar að detta niður. Það er bara svona sæmilegt þar sem best lætur en ekki hægt að tala um nein sérstök hlýindi. Á stórum hluta landsins hefur reyndar verið að kólna jafnt og þétt í eina fimm daga.

Hitinn hefur hvergi náð 20 stigum í þessu hlýindakasti og er því ekki hægt að segja að um hitabylgju hafi verð að ræða. Einna best hefur til tekist á suðvesturlandi. Dagurinn í gær sló dægurhitamet fyrir Reykjavík líkt og dagurinn þar á undan.

En þetta er sem sagt búið. Það var hvort sem er bara verið að hita upp fyrir rigningarsumarið mikla 2009! 

Annað sætið

Þegar þúsundir fögnuðu Jóhönnu Guðrúnu á Austurvelli var hæg austanátt og sól og Veðurstofan mældi 17 stiga hita.

Það mátti sjá það í sjónvarpinu hvað fólkinu leið vel og var ánægt.

Ef kuldi hefði verið og hvassviðri og rigning hefði það spillt gleðinni. 

Veðrið skiptir öllu  máli við útiskemmtanir. Það hefði varla geta verið betra. Í dag mældist reyndar mesti hiti sem skráður hefur verið 17. maí í Reykjavík, 18,3 stig. Og í gær mældist mesti hiti í borginni sem skráður hefur verið 16. maí, 17,0 stig, rétt eftir klukkan 18. Meðalhiti sólarhringsins var líka sá mesti sem skráður hefur verið þann dag 11,7 stig. Það má slá því föstu að meðalhitinn í dag slái líka dagsmetið og verði enn þá meiri en í gær.

Ekki eru þetta þó mestu hlýindi sem geta orðið eftir árstíma. Meiri hámarkshiti og meðalhiti hefur mælst dagana 13.-15. maí, mest 20,6 stig 14. maí 1960.

En dagarnir í dag og í gær hafa krækt í annað sætið í veðurblíðu í Reykjavík eftir árstíma.

Það er vel við hæfi.

Kæling sjávarins

Síðan í morgun hefur verið hlýtt víðast hvar á Reykjavíkursvæðinu.  Hitinn hefur verið síðustu þrjár klukkustundirnar 14-17 stig í austan-eða norðaustanátt. Vindur hefur því staðið af landi. Ein stöð var þó lengi undatekning frá þessu. 

Það var Straumsvík. Þaðan stóð vindur af Faxaflóa og hitinn var ekki nema 8- 9 stig í norðnorðvestanátt. Þangað til kl. 15. Þá hafði áttin breyst í austnorðaustanátt og hitinn var rokinn í 16,4 stig. Sýnir þetta vel hvað hafgolan getur spillt góðviðrisdögum þegar hún ræður ríkjum.

Klukkan 16 var hitinn 16,2 stig í Straumsvík en 16,5 í Reykjavík og búinn að fara í 17,3 stig ( sjálfvirkt) og sama  hámark á Reykjavíkurflugvelli, Geldingarnesi og Korpu. Og sólin skein glatt.

Það þarf ekki að kvarta yfir veðrinu á fyrsta degi listahátíðar.  

Eitthvað annað en á ómenningarhátíðinni í Moskvu!

Andstæður

Meðan í Reykjavík er sólskin og 16 stiga hiti er alskýjað í Moskvu og 8 stiga hiti.

It's true. 

Hvað segir Páll Óskar

Lögreglan gekk ekki í skrokk á mótmælendum sem andmæltu mannréttindabrotum á hommum og lesbíum. Það var bara vegna þess að athygli umheimsins beinist að Rússlandi vegna Söngvakeppni Evrópu. Undir venjulegum kringumstæðum sparar lögreglan ekki barsmíðarnar. En nokkrir  tugir voru handteknir og þeirra bíður líklega ekki neinar ljúfar trakteringar. 

Svona ganga í Rússlandi er ekki skemmtiganga eins og Gay Pride gangan er að mestu leyti á Íslandi. Þarna er hópur fólks að mótmæla einhverri grimmúðlegustu kúgun sem nokkrir hópar í Evrópu verða að sæta. Ekki bara mismunun og höfnun heldur oft og tíðum beinum misþyrmingum.

Sagt er að sumum keppenda í Söngvakeppninni sé órótt og ætli jafnvel að  mótmæla þegar keppnin fer fram. Vonandi að þeir láti að því verða. 

Hvað ætli Páll Óskar annars hugsi en hann er alltaf að tala um keppnina í sjónvarpinu? Getur hann nú ekki sagt eitthvað sem máli skiptir? Eða horfir hann bara í aðra  átt og blikkar augunum  þó verið sé að þjarma af félögum hans?

Sigmar Guðmundsson sagði í hádegisfréttum Ríkisútvarpsins að íslensku keppendurnir hafi ekki mikið frétt af þessum mótmælum og handtökum. En nú ættu þeir að hafa frétt af þeim.  Ekki geta þeir nú borið fyrir sig að vita ekki af þessu.

Ef nógu margir keppendur myndu mótmæla í kvöld myndi keppnin að vísu fara úr böndunum.  En það myndi beina athygli heimsins rækilega að  því að mönnum væri ekki sama um níðingslega meðferð Rússa á hommum og lesbíum. 

Eftir því yrði tekið. 

 

Handtökur vegna gleðigöngu í Moskvu

Ósiður lagður niður

Vonandi verður það framtak þriggja þingmanna Borgarahreyfingarinnar að vera úti á Austurvelli meðan  guðþjónustan fyrir þingsetningu fer fram fyrsta skrefið í þá átt að sá ósiður verði lagður niður að upphaf veraldlegs löggjafarþings hefjist á trúarlegu helgihaldi.

Ekki líst mér samt á hugvekju Siðmenntar sem fram fer á sama tíma. Hún er bara mótvægi við helgihaldið.

Geta menn ekki bara byrjað að þinga formálalaust glaðir í bragði. Hvað eiga svona vitleysislegar serímóníur að þýða? 

Brot úr ævisögu

Í kvöld stillti ég hljóðið á sjónvarpinu á lægsta styrk meðan söngvakeppnin stóð yfir og gjóaði bara augunum á það smávegis þegar verulega sætar stelpur birtust á sviðinu.

Annars var ég að lesa um niðurstöður ískjarnaborana á Grænlandsjökli.

Menn eiga að verja lífsstundunum gagnlega og skemmtilega.   

Mótmæli

Það er gott að vita að maður stendur ekki alveg einn um það að hugsa til þessa manns.

Ekki er hægt annað en undrast þögn málsmetandi manna um málið.  Þeir  láta eins og ekkert sé að gerast, enginn stjórnmálamaður, enginn prófessor, enginn læknir, enginn heimspekingur segir eitt einasta orð. Aðeins birtast stuttorðar og reyndar nokkuð ruglingslegar fréttir um málið í  sumum fjölmiðlum, aðallega á Vísi is. 

Svo hafa auðvitað sorprennur athugasemda á blogginu opnast upp á  gátt.

Hitt er með öllu óskiljanlegt að eini læknirinn sem hefur tjáð sig um málið,  Sigurður Árnason á heilbrigðisstofnun Reykjanesbæjar, lætur ekki sitt eftir liggja í  stíl þess safnaðar og hefur opinberlega gert rækilega lítið úr þeim sem veita þessum hælisleitanda í hungurverkfalli stuðning.

Á þann hátt hefur hann farið langt út fyrir verksvið sitt sem læknis með því að hella olíu á elda í máli sem er því miður umdeilt í þjóðfélaginu. En með orðum sínum var hann í raun að veita málstað stjórnvalda siðferðilegan stuðning. Það er honum til skammar.

Stjórnvöld ætla sér ekki að bregðast við öðru vísi en með því að taka ráðin af manninum þegar hannn verður meðvitundarlaus og firra sig svo allri ábyrgð. 

Og við skulum ekki búast við því að nokkur af hinum nýkosnu alþingismönnum, hvað þá ráðherrum, muni leyfa sér að gagnrýna stjórnvöld í þessu máli. 

Almenningur verður því að taka til sinna ráða.

Og það er hann að byrja að gera. 

 

 

Mótmæla við þingsetningu

Íslendingar fari að dæmi Hollendinga

Rússnesk stjórnvöld hafa bannað göngu samkynhneigða í Moskvu. Gangan mun samt fara fram.

Hollendingar hafa hótað að draga sig úr Söngvakeppni Evrópu ef gangan verður brotin á bak aftur.

Það ættu Íslendingar líka að gera. Og reyndar allar þjóðirnar.

Það er miklu meiri sæmd að standa með þeim sem verða fyrir ofsóknum en vinna sigur í söngvakeppni.

Óvíða verða samkynhneigðir fyrir jafn miklum ofsóknum sem í Rússlandi.