Merkilegur maímánuður

Þessi maí var nokkuð merkilegur veðurfarslega. Í Reykjavík er meðalhitinn 8,2 stig og er þetta næst hlýjasti maí í borginni síðan 1960 en nokkru hlýrra var þó í maí 2008. Hins vegar var sá mánuður þungbúinn og sólarlítill en þessi var vel sólríkur, sólarstundir kringum 217, um 25 klst fram yfir meðallag. Þessi mánuður í Reykjavík var því miklu yndælli að upplifa en maí 2008. Úrkoma var fremur lítil en þó ekki til neinna vandræða fyrir gróður.

Hitinn er tæp tvö stig yfir meðallagi í Reykjavík og svipað á vesturlandi en kringum eitt stig yfir meðallagi fyrir norðan. Mánuðurinn virðist reyndar vera svipaður að hita á landinu öllu og í fyrra.

Einn staður sker sig þó alveg úr. Það er Kirkjubæjarklaustur en þar er hitinn hátt upp í 3 stig yfir meðallagi. Hann er um 9,2 stig.

Svo mikill hiti í maí á Íslandi er sjaldgæfur á nokkurri veðurstöð og hefur ekki komið síðan 1946. Þá var meðalhitinn í maí slétt níu stig á Sámsstöðum í Fljótshlíð. Ekki hefur mælst hlýrri maí á landinu nokkurs staðar en nú á Kirkjubæjarklaustri síðan í maí 1935 þegar 9,5 stig  voru  á  Sámsstöðum. Í heild var sá mánuður hlýjasti maí sem mælst hefur á landinu og meira en heilu stigi hlýrri en þessi sem nu er að líða.     

Fyrir Kirkjubæjarklaustur og víða á landinu var þetta hinn mesti sóma maímánuður.   

Nú, svo fáum við víst rigninngarsumarið mikla 2010!

 

Lygari

Forsætisráðherra Ísraels segir að sérsveitarmennirnir hafi haft líf sitt að verja. En það trúir því ekki nokkur maður að farþegar um borð í skipinu hafi verið svo mikil ógn fyrir alvopnaða sérsveitarmenn að nauðsynlegt hafi verið vegna öryggis þeirra sjálfra að drepa 19 og særa marga. 

Það er háttur herforingja og stjórnmálamanna að ljúga alveg blygðunarlaust til að réttlæta grimmdarverk sín.

Engar fréttir fara af þeim mörgu sem voru í þessari ferð og lifðu af og nú eru í haldi Ísraelsmanna.

Hvað verður gert til að þagga niður í þeim?

Þegar menn banna meira að segja fréttir af atburðum má nærri geta að þeir  séu ekki par hrifnir af tugum sjónarvotta sem sagt geta heimsbyggðinni frá.  

Heimurinn bíður nefnilega eftir frásögn þeirra.

Netanyahu segist harma mannfallið. Og  ætli hann sýni þá ekki harm sinn í verki og bæti aðstandendum tjónið. 

En svo koma bráðum þær fréttir frá Ísraelsmönnum að þeir hafi fundið mikið af vopnum í skipunum sem smygla hafi átt til Gaza. Sanniði til!

Það verður réttlætingin á þessu fádæma grimmdarverki. 

 

Netanyahu: Höfðu lífið að verja

Ótrúlegur atburður

Ég las í frétt að Ísraelsmenn hafi dregið skipið sem þeir réðust á til hafnar í Ísrael.

Sagt er að um 19 séu dánir og yfir 30 sárir.

Svo hafa Ísraelsmenn sett á fréttabann.

En hvað ætla þeir að gera við þá sem lifðu af? Friðarhafa Nóbels þar með talinn og frægan glæpasagnahöfund.

Sagt er reyndar að þeir verði sendir úr landi. En eru Ísraelsmenn ekki smeykir um að farþegarnir eigi eftir að segja heimsbyggðinni ýtarlega frá árásinni? Verður ekki að koma í veg fyrir það með einhverju ráðum?

Hvað verður um hina sáru? Fá þeir einhverja læknishjálp þar sem litið er á þá sem ögrun við Ísrael?

Hvað verður um öll líkin? 

Getur nokkur ríkisstjórn yfirleitt komið sér í meiri vandræði á alþjóðavettvangi en Ísraelsmenn hafa gert með þessu athæfi?

Hér er frásögn af atburðunum.  Sumir segja kannski að hún sé ekki dauðhreinsuð af hlutleysi en hún er varla ótrúverðugri en einhliða frásagnir Ísraelsmanna.

Blair heitir rannsókn á árás

Lítur vel út með maí

Í gær mældist mesti hiti sem enn hefur komið í vor í Reykjavík, 16,3 stig. Þetta gerðist seint að deginum, um kl. 18 eftir að vindur hafði snúist í norður úr vestri, en þremur tímum fyrr var hitinn aðeins tólf stig. Hitinn hélst vel fram eftir kvöldi, var enn 14 stig kl. 21. Meðalhiti sólarhringsins var einnig sá mesti sem enn hefur komið, 11,0 stig, 3,6 stig yfir dagsmeðaltali. Ekki dró úr blíðunni að sólin skein lengur en verið hefur, sem sagt allan guðslangan daginn, í 17 klukkustundir. Hámarkshitinn er sá mesti sem mælst hefur í Reykjavík þennan dag en það segir kannski ekki mikið því meiri hiti, jafnvel yfir 20 stig, hefur mælst allmarga daga fyrr í mánuðinum eins og sjá mér hér.  Þá hefur hiti enn ekki náð 20 stigum neins staðar á landinu á kvikasilfursmæli.

Mesti hiti sem mælst hefur þannig á landinu þennan dag er 23 stig og um þetta leyti 26 stig.

Maí lítur annars vel út í höfuðborginni. Meðalhitinn er kominn upp í 7,8 stig eða 1,6 stig yfir meðallagi. Fyrstu vikuna var sól af skornum skammti en síðan hefur mikið ræst úr og eru þær orðnar um 142 og eiga mjög líklega eftir að fara upp fyrir mánaðarmeðaltalið áður en yfir lýkur. Úrkoma hefur lítil verið hingað til. 

Við Breiðafjörð og á Vestfjörðum virðist hitinn vera um  tvö stig yfir meðallagi þar sem af er. En kringum þrjú stig yfir meðallagi á Kirkjubæjarklaustri þar sem meðalhitinn er nú 9,2 stig. Svo hár meðalhiti er sjaldgæfur í maí á landinu og hefur ekki verið á Kirkjubæjarklaustri síðan 1946 en mögulega heldur stöðin níu stigunum til mánaðarloka 

Næstu daga verður enn hlýtt á suðurlandi en síðan rysjóttara. Meðalhiti í Reykjavík gæti þó mjakast upp í 8 stig en varla mikið meira en það.

 

 

 

Sólarhringsúrkoman í Vík í Mýrdal

Á vef Veðurstofunnar í gær var úrkoman sem fallið hafði í Vík í Mýrdal frá kl. 9-18 talin vera sléttir 230 mm. Í morgun kl. 9 var úrkoman sögð vera 236,6 mm sem mæld var til þess tíma frá kl. 9 daginn áður en þetta er það tímabil sem vaninn er að mæla og skrásetja sólarhringsúrkomu.

Mesta sólarhringsúrkoma í maí á landinu hingað til er 147,0 mm á Kvískerjum 1973.

Sé þessi tala frá Vík rétt er hún ekki aðeins mesta sólarhringsúrkoma sem nokkru sinni hefur verið mæld á landinu í maí heldur hefur aðeins mælst meiri sólarhringsúrkoma í október og janúar.

Næst mesta úrkoma í gær frá kl. 9-18 var á Kirkjubæjarklaustri, 7,5 mm. Næsta mesta sólarhringsúrkoma kl. 9 í morgun var 27,4 mm í Skaftafelli.

Ég á ansi erfitt með að trúa því að sólarhringsúrkoman í Vík í Mýrdal, eða kannski öllu heldur úrkoman frá kl. 9-18 í gær, sé þarna rétt mæld eða rétt skráð.

 

Trúarjátning

Í eðli mínu er ég ofurstrangur og ósveigjanlegur bókstafstrúarmaður en hef bara aldrei fundið réttu bókina.

Farið hefur fé betra

Þeir sem efstir eru á lista Besta flokksins eru alveg eins hæfir til að stjórna borginni eins og þeir sem efstir eru á öðrum listum. 

Við þekkjum þá sem verið hafa í forsvari fyrir borgina og þá sem hafa verið í minnihluta.

Skelfing er það leiðinlegt lið og hefðbundið stjórnmálalegt.

Margir eru búnir að fá yfir sig nóg af því. 

Sagt er að Besti flokkurinn sé með fíflalæti. Það má rétt vera en það eru að minnsta kosti skemmtilegri fíflalæti en þau drepleiðinlegu fíflalæti sem gömlu flokkarnir í borgarstjórn hafa haft í frammi á kjörtímabilinu.  

Það yrði sögulegur atburður ef eins konar andófslisti gegn hefðbundnum stjórnmálaflokkum næði völdum í borgarstjórn.

Verst að alþingiskosningar séu ekki á næsta leyti.

Vonandi springur ríkisstjórnin sem fyrst svo hægt verði að koma betri mönnum og konum að.

Görmlu íslensku stjórnmálaflokkarnir hrundu í rauninni allir með hruninu.

Og farið hefur fé betra. 

 

Spurning

Er það óviðeigandi spurning að undrast það hvers vegna ekki er gert eins mikið úr þessari hættu, og reyndar ýmsum öðrum sem að vistkerfi heimsins stafa, og úr hlýnun andrúmsloftsins af mannavöldum?

Enginn fiskur árið 2050?

Er ég litblindur

Á háloftaritinu frá Keflavík og Egilsstöðum sem birt eru á vef Veðurstofunnar eru hjálparferlar, þrjár línur sem sagt er að séu gul, blá og græn lína. 

En hvernig sem ég horfi finnst mér allar þessar línur vera rauðar. Aðra liti sé ég ekki.

Og þá vaknar hin brennandi spurning: Er ég litblindur eða mættu þessi háloftarit vera skýrari?

Hægt er að sjá svona háloftarit frá Keflavík á öðrum vefjum, miklu skýrari, svo sem hér og hér. Á þessum háloftaritum greini ég alla liti enda er ég skarpskyggn sem örn er svífur tignarlega um háloftin!

Ég er sem sagt ekki litblindur. 

Haldlaus og ómerkilegur málflutningur

Sigurður G. Guðjónsson segir að vinubrögð slitastjórnar Glitnis séu ''enn ein sönnun þeirrar  rannsóknargerggjunar,  sem nú ríður yfir íslenskt þjóðfélag''. 

Hugsanlega hefur Sigurður eitthvað fyrir sér út af fyrir sig í því að málsókn Glitnis gegn þessum Pálma sé ómakleg. En hvað á hann við með þeim orðum, sem á engan hátt eru rökstudd, heldur sett fram sem staðhæfing,  að rannsóknargeggjun ríði yfir þjóðfélagið?

Augljóslega er hann þó að vísa út fyrir þetta Pálmamál til annarra rannsókna í þjóðfélaginu.

Allir vita að sérstakur saksóknari er að rannsaka meint misferli. Skýrsla rannsóknarnefndar Alþingis sýnir að ekki er vanþörf á. Ekki er hægt að komast hjá því að ætla að Sigurður eigi meðal annars við rannsókn sérstaks saksóknara. 

Sigurður kallar ransóknir málanna geggjun. Þær séu þá ekki byggðar á raunhæfri undirstöðu. Þær séru bara rugl, geggjun.

Þetta er fádæma ómerkilegur en jafnframt gersamlega haldlaus málflutningur. Hann er eingöngu settur fram til að skapa tortryggni um heilindi og réttmæti þeirra fjármálarannsókna sem nú fara fram. Skapa óvissu, hik og  ráðvillu með yfirvöldum og þjóðinni. Og taka höggið af þeim sem verið er að rannsaka.

Á sama tíma stendur eftirlýstur maður um allan heim, sem tengist helstu misferlarannsókninni,   uppi í hárinu á lögmætum yfirvöldum og virðist vera staðráðinn í því að hafa þau að engu. 

Furðu lostin þjóðin hlýtur að vænta þess að yfirvöld tryggi að réttvísin gangi sinn gang og beiti til þess þeim ráðum sem nauðsynleg eru.

Segir rannsóknargeggjun ríða yfir þjóðfélagið