Jóla og áramótaveðrið frá 1807

Yfirleitt er veðrið skaplegt um jólin. Þau eru ýmist mild eða frostasöm en næstum því aldrei er sama veðurlag alla þrjá jóladagana. Lítið er um fræg jólaóveður. Samt var mikið vestanveður á aðfangadagskvöld 1957 og varð þá minnisstæður stórbruni í Þingholtunum í Reykjavík  Víða var stormur á aðfangadag 1974. Að morgni aðfangadags 1989 var sums staðar fárviðri syðst á landinu en annars staðar var einnig mjög hvasst. Mikið tjón varð undir Eyjafjöllum í þessu veðri.  Um kvöldið var loftvægi í Vestmanneyjum aðeins 927,5 hPa. Snjókoma setti mjög svip sinn á aðfangadag árið 1960 og 1971 og lokuðust þá vegir. Einnig snióaði árin  1977 og 1983. Árið 1988 var austan stormur og snjókoma um allt land á jóladag en  sums staðar var vindhraðinn 40 m/s eða jafnvel meiri.

Einstaklega köld jól voru árin 1995, 1968 og 1965 og fyrir norðan líka árin 1980, 1988 og 1989. Sérlega hlýtt var á jólunum 2006, 1948, 1940, 1934 og 1933 sem líklega voru allra hlýjustu jólin.  

Á vef Veðurstofunnar má sjá veðrið kl. 18 á aðfangadag og á hádegi alla jóladaga frá 1949  og snjóhulu í Reykjavík.  Reyndar er hægur vandi að fletta upp á hvaða hátíðisdegi sem er frá 1949 á vef Veðurstofunnar.  Og það ættu menn endilega að gera fremur en liggja í þessum jólabókum!

Úrkomusömustu jól í Reykjavík voru 2005 en 1960 á Akureyri.

Frá 1949 er kaldasti gamlársdagur í Reykjavík og á Akureyri  árið  1976 en 1971 sá hlýjasti í Reykjavík en fyrir norðan var  1968 sá hlýjasti. Hlýjasti nýjársdagurinn í Reykjavík var 2003 en 1973 fyrir norðan. Kaldastur nýjársdaga í Reykjavík var 1948 en á Akureyri 1977. 

Á töflunum á fylgiskjali er annars hægt að sjá hvaða hátíðisdagar voru hlýjastir og kaldastir bæði í Reykjavík og á Akureyri. 

Þar er hægt að sjá hita, sól og úrkomu yfir alla jóladagana (reyndar líka Þorláksmessu), gamlársdag og nýjársdag í Reykjavík frá 1882 og frá Akureyri frá 1949 en fyrir þann tíma hef ég ekki aðgang að daglegum gögnum um þann stað. Hins vegar eru hér upplýsingar um hita og úrkomu á Hallormsstað frá 1937 til 1948. Veður er ekki alltaf það sama á þessum stöðum en oft er það svipað og Hallormsstaðatölurnar ættu  að gefa bendingu um ástandið á norðausturlandi og jafnvel norðurlandi á jólunum þetta tímabil.

Fyrir Reykjavík eru því miður litlar sem engar upplýsingar á lausu um hitann árin 1924 til 1934, aðeins þegar mestur hiti eða kuldi viðkomandi desembermánaðar hefur fallið á jóladagana, en hins vegar upplýsingar um sól og hita. Hins vegar er hér meðalhiti þessara daga, og aðeins hann, árin 1932-1934 frá Kirkjubæjarklaustri sem sýnir hve mild þessi jól voru en sól og úrkoma er  þessi ár frá Reykjavík eins og öll hin árin.  Í nokkrum elstu töflunum er dálítið um eyður i dálkum.  

Einn dálkur sýnir snjóhulu í Reykjavík frá 1921 og snjódýpt kl. 9 á jóladagsmorgun. Alhvít jörð er 4 en jörð hvít að hálfu er 2.

Úrkoman er hér auðvitað í mm og sólarstundir í klukkustundum. Menn skulu athuga vel að úrkomutölur við hvern dag er úrkoma sem mældist frá kl. 9 þann dag til kl. 9 daginn eftir. Þegar úrkomudálkur er auður hefur ekki komið dropi úr lofti en núllið stendur fyrir vott af úrkomu sem ekki var þó mælanleg. Þá skal nefnt að sól á Akureyri mælist aldrei um jólin  vegna þess að fjöllin byrgja hana.

Nýjársdagurin er auðvitað alltaf  á næsta ári miðað við þá ársetningu sem er við hver jólin í töflunum.  

Dagar með hæstu og lægstu gildi eru auðkenndir með rauðu og ætti því að vera auðvelt að finna þá í töflunum. 

Meðalhitinn er þarna raunverulegur meðalhiti fyrir Akureyri og Hallormsstað en í Reykjavík til ársins 1935. Frá 1888 til 1902 er hins vegar meðaltal hámarks-og lágmarkshita viðkomandi dags í Reykjavík en árin 1907 til 1919 er um að ræða meðaltal mesta og minnsta álesturs á hitamæli frá því snemma morguns þar til seint á kvöldi, ekki raunverulegs lágmarks-og hámarkshita. 

Á blaði tvö á fylgiskjalinu má svo sjá mesta og minnsta  hita á landinu öllu hvern hátíðardag frá 1949 og hvar sá hiti mældist.  Þar eru sjálfvirkar stöðvar inni frá 1996 með hámarkið án þess að þess sé sérstaklega getið en fyrir þann tíma eru aðeins mælingar frá mönnuðum veðurstöðvum. og allan tímann fyrir lágmarkið. Á blaði þrjú má sjá meðalhita hvers hátíðardags og meðalhita jóladaganna og áramótanna og einnig úrkomuna og hvað hún hefur verið mikil alls í Reykjavík og á Akureyri. 

Þá geta menn einnig séð hér á blaði 1 með sínum eigin augum mesta og minnsta hita þessara daga í Reykjavík árin 1829-1850 og meðaltal þess. Þessar mælingar eru ekki eins áreiðanlega og hinar og eru hér hafðar með til gamans. Árin 1820-1828 er einungis ein hitatala við hvern dag og á kannski að segja eitthvað um mildi eða hörku þeirra jóla. 

Við Eyjafjörð voru gerðar einhvers konar athuganir þrisvar á dag árin 1807-1813 og má hér sjá hitann á þeim árum um jól og áramót. Sérlega norðlensk nítjándualdar rómantík! 

Loks er hægt að sjá lágmarks- og hámarkshita í Stykkishólmi árin 1845 til 1918 og úrkomuna frá 1877. Frá 1874-1918 er meðalhitinn sem sýndur er meðalhitinn kl. 9 og 21 eða 22 en annars meðaltal hámarks-og lágmarkshita. Stykkishólsmhitinn heldur hér svo áfram árin 1924-1934, þegar ekki er hægt að fá dagsmeðaltöl fyrir Reykjavík en ekki er um hámarks-og lágmarkstölur að ræða heldur hitann þrisvar á dag og meðaltal hitans kl. 9 og 21 eða 22.  Árið 1919 er vandræðaár og ekkert liggur á lausu hvorki frá Reykajvík né Stykkishólmi og er þá gripið til Vestmannaeyjakaupstaðar fyrir það ár svo menn hafi eitthvað hugboð um hitafarið um þau jól og áramót. Það fer ekki á milli mála að jólin 1880 eru þau köldustu sem komið hafa á landinu þann tíma sem þessar töflur ná yfir.

Ótrúlega áhugavert og jólalegt með afbrigðum! Þeir sem munu skoða þetta vel og vandlega verða fyrir vikið upphafnir umsvifalaust í The Incredible Weather Hall of Infame!  

Það sem hér er framborið er tekið eftir Íslenskri veðurfarsbók 1920-1923, Veðráttunni 1947-2002, Veðurfarsyfirliti frá 2003 og áfram og loks ýmsum öðrum gögnum frá Veðurstofunni.  

Ég óska öllum þeim sem nenna að lesa bloggsíðuna mína gleðilegra jóla. Líka þeim sem nenna því ekki. 

Skrár tengdar þessari bloggfærslu:

• jolavedur.xls

Jólasnjórinn

Hanna G. Sigurðardóttir var áðan í útvarpsþætti sínum, ''Vítt og breitt'', að tala um að nú væri jólasnjór og bætti við: ''Bara að hann fari nú ekki''.

Í morgun var snjódýpt 10 cm í Reykjavík og búið að vera alhvítt í fimm daga. Í nótt bættust 5 cm við snjóinn. Næstu daga mun bætast enn meira við. Hins vegar er spáð hláku og rigningu 22. desember og mun hún standa alla jóladagana ef spáin engur eftir. Ég held samt að þessi hláka verði ekki mjög sterk og búast megi fljótlega við suðvestanátt og éljagangi.

Hvergi er nú alautt á landinu en jörð er þó einungis flekkótt af snjó sums staðar við suður- og norðausturströndina, á vesturlandi og Vestfjörðum og - merkilegt nokk - inni í Eyjafjarðardal  og Bárðardal.

Ég efast mjög um að snjó taki upp í Reykjavík fyrir jól en hann gæti verið orðinn æði skítugur og slabblegur og kannski verður flekkótt og miklir klakabunkar. Svona nokkurn vegin eins andstyggileg jörð og hugsast getur að vetrarlagi.

Í fyrra var alhvítt að morgni  Þorláksmessu í Reykjavík og var alhvítt um öll jólin, komin 12 cm snjódýpt á öðrum degi jóla. Á Akureyri var jörð aðeins talin flekkótt að morgni jóladags en alhvítt aðra jóladagana. Öllum að óvörum var alhvít jörð á jóladagsmorgun í Reykjavik árið 2006 en snjólaust var á aðfangadag kl. 18 þegar hátíðin gekk í garð og alla aðra jóladaga og þetta ár voru alauð jól á Akureyri. Reyndar held ég að flestir miði í huga sér við kl. 18 á aðfangadag hvað  hvít jól varðar eða  rauð. Á Veðurstofunni er snjóhula hins vegar aðeins athuguð klukkan 9 að morgni og segir ekkert um hvernig snjólag er klukkan 18. Hins vegar er hægt að sjá hér veðrið á þeim tíma um land allt frá 1949 á aðfangadag.

Það hafa sem sagt verið hvít jól í Reykjavík tvö ár í röð og hugsanlega verður þetta þriðja árið. Athugasemd fréttamanns sjónvarps á dögunum um það að nú séu alltaf rauð jól í borginni stenst sem sagt ekki betur en þetta. Eins og sjá má á snjóatöflunni er nokkur munur á jólasnjó eftir tímabilum þegar nokkur ár eru tekin saman.  Eftir 1996 hefur verið lítill snjór um jólin en mikill árin 1990-1995 og enn meiri 1979 til 1984 en aftur yfirleitt ítill og oft snjólaust alveg frá fjórða áratugnum og fram á miðjan sjöunda áratuginn. Snjóleysi í Reykjavík er því engin nýlunda um jólin.

Hægt er að sjá hér snjóalög í borginni á jóladagsmorgun alveg frá 1921. Misræmi er í töflunni um árið 1964. Þar stendur í einum dálki að alautt hafi verið en í öðrum að snjóhula hafi verið 2 af 4 hlutum.

Ég vona innilega að allan snjó taki upp í borginni fyrir jólin. Fátt er eins ójólalegt og hallærislegt og hvít jól!  

 

Nauðsyn langtíma veðurathugana

Það dylst engum að veður og veðurfar skiptir landsmenn miklu máli alla daga ársins, ekki aðeins hvað mannvirki og önnur verðmæti varðar heldur beinlínis líf þeirra og limi. Undirstaða góðra veðurspáa eru veðurathuganir. Undirstaða þekkingar á veðurfari landsins og ekki síst skilnings á breytingum á veðurfari, en sá skilningur er nú svo mikilvægur, eru langtíma veðurathuganir á sama stað. Þær veðurstöðvar sem lengst hafa starfað eru því sérlega mikilvægar.

Mönnuðum veðurathugunarstöðvum fer fækkandi. Því valda breyttar þjóðfélagsaðstæður fyrst og fremst. Menn bregða sér oftar af bæ nú en áður var en veðurathuganir eru mjög bindandi. Það er því hægt að skilja það að menn vilji losna við mannaðar veðurathuganir, jafnvel þar sem mælingasagan er mjög löng. Þá hefur oft verið gripið til þess ráðs að setja upp sjálfvirkar athugunarstöðvar á sama stað. Síðan verða veðurmenn að finna út samræmið milli mönnuðu og sjálfvirku athuganna því svona breytingar valda hniki í athuganaröðinni. 

En nú er það nýjasta nýtt að landeigendur jarða þar sem athugað hefur verið í jafnvel meira en heila öld vilja bara losna líka við sjálfvirku stöðvarnar af landareign sinni. Það er illskiljanlegt. Mér finnst það lýsa ótrúlegri skammsýni og skilningsleysi. Athuganirnar hófust löngu áður en núverandi landeigendur fæddust og hafa verið mikilvægar fyrir veðurathuganasögu landsins og rannsóknir á veðurfari. Þetta varðar því beinlínis almannahag og það ættu landeigendur að hugsa út í Þó enginn efist um rétt þeirra til að fokka upp veðurathuganastöðvum. 

Úr því landeigendur eru nú komnir á bragðið má spyrja hvað gerist næst. Má ekki búast við því að allar veðurathuganir verði gerðar útlægar til dæmis af Teigarhorni þar sem athugað hefur verið frá 1872, Grímsey frá 1874 og Grímsstöðum á Fjöllum frá 1907, svo aðeins nokkrar gamlar veðurathuganastöðvar séu nefndar. 

Og getur nokkur sagt eitthvað ef bæjarstjórnin í Stykkishólmi vildi leggja niður elstu veðurathuganastöð landsins sem er þar í bænum?

Er ekki hægt að setja lög um  eins konar friðhelgi veðurathugana á elstu veðurathuganastöðvunum sem hindraði bændur og búalið í að gera viðkomandi stöðvar alveg útlægar af landareign sinni? 

Nú snúa kannski sumir upp á sig og segja: Eignarrétturinn er  heilagur og það má ekki setja kvaðir á landeigendur. (Ýmsar kvaðir á þá eru þó nú þegar fyrir hendi). En ég sný þá enn þá meira upp á mig og spyr á móti:

Eiga landeigendur að komast upp með það að leggja elstu og mikilvægustu veðurfarsrannsóknir í landinu í rúst bara eftir dyntum sínum og duttlungum? 

 

Stórtíðindi fyrir veðurdellufólk

Í dag kom danska veðurbókin, Meteorologiske Aarbog, sem gefin var út af dönsku veðurstofunni inn á vefinn á tímarit.is. Hægt er  skoða árin 1873-1919 og sjá þar m.a. daglegt veður á nokkrum veðurathuganastöðvum.

Þessar bækur hafa aðeins verið til á Landsbókasafni og hjá Veðurstofunni og ekki verið hlaupið að því fyrir fólk að komast í þær (menn biðu alveg í röðum!). En nú geta menn legið í þeim heima í stofu yfir ilmandi kaffi og kleinum. Og þarna er ólíkt meiri vísdómur en finna má í bullinu á blogginu og feisbúkkinu.

Já, ég skal segja ykkur það! Er einhver að tala um kreppu?   

Ég verð víst lítið til viðtals á blogginu eða búkkinu á næstunni.

Viðbót: Hér má sjá lýsingu á efni þessarar bókar og líka Íslenzkri veðurfarsbók sem líka er komin á netið á tímarit.is. 

Hitalistar Veðurstofunnar

Á gamla vef Veðurstofunnar er hægt að sjá hámarks-og lágmkarshita á öllum veðurskeytastöðvum nema einni. Sýndur er listi frá kl.18-18 síðdegis en á morgnana kl. 9-9.

Fyrir sjálfvirku stöðvarnar eru hins vegar ekki til neinir svona listar og þurfa menn að leita að þessu sérstaklega innan um hitann á klukkustundarfresti á sjálfvirku stöðvunum. Það tekur lungan úr deginum fyrir allar stöðvarnar.

Þessi eina skeytastöð sem stíað er burtu er Vík í Mýrdal sen hvergi er getið. Ef ég byggi þar fengi Veðurstofan engan frið fyrir mér í símanum fyrir kvabbi. Veðurstofufólkið fengi nú bara grænar bólur af því einu að hugsa til mín! 

Ég hef reyndar sagt það áður og segi  það enn að það er ekkert vit í því að hafa tvo vefi í gangi samtímis eins og er hjá Veðurstofunni. Ekkert er t.d. hirt um að halda þeim gamla við eins og best sést á þessu með Vík í Mýrdal. Afhverju var bara ekki beðið með nyja vefinn þar til allt á þeim gamla var komið á hann, en þó í betri mynd?   

Vinda þarf bráðan bug að því að koma upp á vef Veðurstofunnar góðum hámarks-og lágmarkslista fyrir allar veðurstöðvar sem væri þó líka með upplýsingum um úrkomu. Jafnframt á að vera hægt að sjá veðrið á skeytastöðvunum á þriggja stunda fresti og klukkutíma fresti á þeim sjálfvirku eins og sést á núverandi listum á gamla vefnum. En hámarks-og lágmarkslistinn má alls ekki vera bara frá kl. 18-18 sem gerði það að verkum að oft væru tölurnar í raun frá deginum áður og enginn vissi hvaða hiti hefði mælst á réttum degi.

Nei, listinn eða öllu heldur listarnir ættu auðvitað að vera svona fyrir veðurskeytastöðvarnar: Hámarks og lágmarksmælingar frá kl. 9-18 og svo aftur frá kl. 18-9. Slíkir listar hafa lengi verið til á Veðurstofunni. Það er bara til að rugla venjulegt fólk í ríminu að birta lista frá kl. 18-18 og líka (en þó miklu skárra) frá kl. 9-9. Þeir listar ættu eingöngu að vera til heimabrúks á Veðurstofunni.

Fyrir sjálfvirkar stöðvar eiga listarnir líka að vera svona en einnig ætti að vera aðgengilegur listi frá miðnætti til miðnættis fyrir þær.  Ef einhverjir listar eiga einhvern tíma eftir að komast í gagnið er maður með lífið í lúkunum yfir því að þeim verði klúðrað all svakalega.   

En þeir eiga að vera eins og ég var að segja að þeir ættu að vera herrar mínir og frúr! Takiði nú einu sinni mark  á eina leikmanninum sem mark er á takandi um málefni Veðurstofunnar!!

Annars er voðinn vís!

Votviðrasamur september á suður-og vesturlandi

Nú er ljóst að þessi september er sá annar úrkomumesti sem mælst hefur í Reykjavík. Metið er frá 1887, 176,0 mm, en nú reikna ég úrkomuna 173,6 mm.

Víða á suður-og vesturlandi er ljóst að þetta er úrkomusamasti september síðan mælingar hófust. Hér verða nefnd nokkur dæmi um stöðvar sem settu met og innan sviga er árið þegar mælingar á þeim hófust.

Fyrst er þá Stykkishólmur (1856) þar sem metið frá 1933 var glæsilega slegið. Þar fauk líka sólarhringsúrkomumetið. En auk þess Andakílsárvirkjun (1950) þar sem úrkoman núna var hátt upp í helmingi meiri en hún hefur áður verið, 1959; Stafholtsey (kringum 1990), Ásgarður í Dölum (1992), Mjólkárvirkjun (1960), Hólar í Dýrafirði (1982), Hæll í Hreppum (1927). Annars staðar en á suðurlandi, vestan við Mýrdal,  og upp á sunnanverða Vestfirði, er langt í frá að úrkoman í þessum mánuði sé eitthvað sérstök, nema á Kvískerjum í Öræfum, úrkomusamasta stað landsins. Mér kæmi ekki á óvart þó þessi  mánuður hafi þar sett Íslandsmet í úrkomu í september, en ekki hafa síðustu daga komið þaðan fréttir inn á netið nema frá sjálfvirku úrkomustöðinni.  

Ekki þori ég fyrir mitt litla líf að nefna tölur því þær hef ég kannski sumar ekki alveg hundraðprósent réttar, en ég þori að hengja mig upp á þessi met. Nú, ef þau eru ekki rétt, þá hengi ég mig bara - og þó fyrr hefði verið!

Meðalhitinn í Reykjavík er í kringum 9,4 stig sem eru talsverð vonbrigði því hann var 10,1 stig þ. 24. Sólskinsstundir eru eitthvað nærri 100 sem er hvorki mikið né lítið. Mánuðurinn er annars hlýr um allt land og líklega víðast hvar tiltölulega hlýrri annars staðar en í Reykjavík og jafnvel í hreinum tölum.  Á austurlandi kemur mánuðurinn mjög vel út, held ég.    

Sumar á Íslandi er talið vera frá júní til september. Ekki er hægt að segja annað en þetta ágæta sumar endi alveg hörmulega. Nú er hálfgert vetrarveður fyrir norðan og í morgun var alhvít jörð og snjódýpt 1 cm á Skeiðsfossvirkjun í Fljótum og jörð talin flekkótt af snjó á nokkrum stöðum á norðausturlandi. Þetta er fyrsti haustsnjórinn.  Hiti núna er langt undir meðallagi og vel getur verið að fara að snjóa í Reykjavík næstu daga. Eitthvað álíka hefur auðvitað gerst áður en þetta er alveg jafn andstyggilegt fyrir því. Október hefur oft verið ljúfur síðustu árin og stundum verið sumarveður.

Nú  leggst það í mig að verði óárán hin mesta í vetur og muni hann Lurkur kallaður verða eður Hreggviður!

Sumarið er víst búið í Reykjavík

Síðustu fimm dagar hafa verið andstyggilegir, hvassir og blautir. Það hefur ekki verið hægt að njóta lífsins úti eins og verið hefur. Þetta veðurlag kom í kjölfar illviðrisins sem skall á að kvöldi þ. 16. Og  á að halda áfram næstu daga. Veðurlag af þessu tagi endar æði oft í norðanátt og kulda. Mér skilst að svo muni núna líka fara. Þá birtir til á suðurlandi en hitinn verður ekki lengur yfir tíu stigum á daginn heldur miklu lægri. Fyrir norðan er þá spáð slyddu. Á austurlandi hafa síðustu dagar verið góðir og sumir segja að þar hafi sumarið fyrst byrjað í september.

En sumarið er sem sagt búið hér í Reykjavík!

Meðalhitinn það sem af er september er þó enn kringum tíu og hálft stig eða tvö og hálft fyrir ofan meðallag. Hann er sem sagt með hlýjustu septembermánuðum en mun varla gera miklar rósir að leiðarlokum. Í nótt féll hitinn niður í 3,5 stig. Jafn kalt var 19. júní en ekki hefur verið kaldara síðan 21. maí.  Annars hefur veðrið undanfarið verið þannig að maður yrði ekkert undrandi þó það færi að snjóa. Einstaka sinnum hefur snjó fest í Reykjavík í september, síðast árið 1969. Úrkoman í borginni er kominn langt yfir meðallagið og á víst heilmikið eftir að bætast við. 

Fátt er betra en bjartir góðvirðisdagar en samt hlýir í kringum haustjafndægur. Þá fáum við líklega ekki að þessu sinni. Til að menn viti hvað ég á við birti ég kort á hádegi af einum slíkum en þá var blíðuveður á suðvesturlandi. Mikið man ég vel eftir þessum degi. Það var fyrsta haustið eftir að ég fékk veðurdelluna, einkennilegustu og nördalegustu dellu í heimi!

Ég hef verið að skrifa pistla hér á blogginu um hlýjustu og köldustu mánuði á landinu. Byrjaði ég á þessu í október í fyrra og er nú að skrifa um september og verður þá þessari syrpu lokið. Síðasti pistillinn mun birtast hér á blogginu næstu daga við gífurleg fagnaðarlæti minna hysterísku aðdáenda sem reyndar hefur fækkað mjög síðustu daga. Bráðum verða þeir fyrrverandi hysterískir aðdáendur!  

 

Glæsileg hitamet í Reykjavík og víðar

Hitinn í dag í Reykjavík fór í 25,7 á kvikasilfursmæli. Það er mesti hiti sem þar hefur mælst. Gamla metið var lásí 24,8 frá 11. ágúst 2004. 

Nokkur allsherjar hitamet voru líka slegin á suðurlandi (gömlu metin innan sviga):

Hjarðarland í Biskupstungum 28,8 (28,5 11.ág. 2004)

Eyrarbakki 27,5 (25,5, 11. ág. 2004)

Stórhöfði 21,6 (21,2, 24. júlí 1924)

Á Hæli í Hreppum var allsherjarmetið, 27,9, þ. 11. ágúst 2004, ekki slegið en nýtt met í júlí var sett, 27,2 (26,4, þ. 24. 1939).   

Ekki voru slegin önnur met á mönnuðum veðurathugunarstöðvum.  

Á sjálfvirkum stöðum á suðurlandi og á Reykjavíkursvæðinu voru víða slegin met. Hér eru nokkrar spektakúlar tölur: Þingvellir 29,7 sem var mesti hiti á öllu landinu og kl. 15 og 16 var hitinn þar 29,3 stig. Þyrill í Hvalfirði 28,0 Skrauthólar á Kjalarnesi 28,4, Geldinganes 27,5, Korpa 27,2, sjálfvirka stöðin í Reykjavík 26,4, Flugvöllurinn 26,2 og Skálafell við Esju í 771 m  hæð 23,1 stig.

Þrátt fyrir allt þetta er maður fúll yfir því að 30 stiga múrinn skuli ekki hafa verið rofinn.   

Loksins var 25 stiga múrinn  í Reykjavík rofinn.

Viðbót: Klukkan 21 var hitinn 26,0 stig á Hólum í Dýrafirði. Það er ekki aðeins met þar heldur hefur jafn mikill hiti alldrei mælst á öllum Vestfjörðum.  

 

Þriðji sólríkasti júní í Reykjavík

Nú er ljóst að júní var sá þriðji sólríkasti í Reykjavík síðan mælingar hófust. Sólskinsstundir voru næstum því 314. Sólríkari var júní 1928, 338,3 stundir og 1924, 313,2 stundir. Maímánuðir árin 2005, 1967 og 1958 voru einnig nokkuð sólríkari en þessi. En þessi mánuður var hlýjastur allra þessara mánaða. Meðalhitann er 10,6 stig. Frá 2002 hafa þó, merkilegt nokk, fjórir aðrir júnímánuðir verið álíka hlýir eða hlýrri en samt er mánuðurinn á topp tíu listanum frá upphafi. 

Í Vestmannaeyjum virðist þessi júní vera um hálfu öðru stigi yfir meðallagi og jafnvel sá næst hlýjasti frá upphafi. 

Á Akureyri virðist hitinn vera í meðallagi en undir því á austurlandi inn til landsins.  

Hvað viljiði það betra kæru borgarbúar? Nú fáum við svo vel yfir tuttugu stiga hita á suðuvesturlandi í vikunni ef spár ganga eftir.

Glæsilegur árangur

Nú er ljóst að maí var í Reykjavík sá hlýjasti síðan 1960. Meðalhitinn var 8,6 stig og er 2,3 stig yfir meðallagi. Þetta er jafnframt þriðji hlýjasti maí í borginni síðustu 150 árin. Aðeins maí 1935 (8,9) og 1960 (8,7) voru hlýrri.

Allir dagar mánaðarins voru yfir meðallagi og er það sannarlega sjaldgæft. Úrkoman var vel undir meðallagi, kringum 70% af því, en mánuðurinn var sólarlítill, vantar svona 50 sólarstundir upp á meðallag. Mesti hiti mánaðarins var í lægra lagi, merkilegt nokk með svo hlýjan mánuð, aðeins 13,8 stig en aftur á móti gerði aldrei frost. 

Lítið fór fyrir hitametunum á landinu sem spáð var. Hitinn fór aldrei í 20 stig á mannaðri stöð en komst í 21,7 stig á sjálfvirku stöðinni á Hallormsstað einn daginn. 

Nú er það bara spurningin hvort mánuðurinn hafi ekki líka náð 8 stigum á Akureyri. Frávik beggja staðanna frá meðallagi er eitthvað svipað, vel yfir tvö stig.

Þetta var glæsilegur árangur hjá honum maí og við Mali erum ekki minna stoltir af honum en "strákunum okkar". Ekki spillir svo að ég sagði þetta hér hálfpartinn fyrir. Mjá! Það held ég nú.