Móðgun við þjóðina

Það er móðgun við þjóðina eftir búsáhaldabyltinguna að dubba Jón Bjarnason upp í embætti ráðherra.

Það skiptir engu máli í hvaða flokki hann er. En tími jafn forpokaðra gjammara eins og hans ætti að vera liðinn. Hann er aftan úr öldum pólitískrar lágkúru.

Lærðu menn ekkert af umrótinu í vetur?  

Vík í Mýrdal er olnbogabarn

Það er gott framtak að byrjað er að kynna veðurstöðvarnar eina af annarri í veðurfréttatímum sjónvarpsins. Fyrsta stöðin sem kynnt var er Vík í Mýrdal sem sendir skeyti þrisvar á dag.

En því miður er þetta algjör felustöð. Hún fær ekki inni með sínar athuganir á vef Veðurstofunnar nema hvað úrkomuna að morgni snertir. Hún er eina skeytastöðin sem höfð er útundan. 

Til hvers annars að kynna veðurstöð sem er höfð í í felum? 

Vesalings Vík í Mýrdal er olnbogabarn.  

Hvað táknar það

Nú er Svandís orðin ráðherra.

Hvað táknar nú það?

Húrra fyrir þeim sem hugsa öðruvísi

Ég rakst á þessa skoðun um vændi á bloggsíðu.

Ég held að hún gangi stundum upp í vestrænum ríkum löndum. 

En mansal er staðreynd og nauðungarvændi í ýmsum myndum víða um heim. Ekki má gera lítið úr því

Hins vegar þorir nánast engin að nefna hér á landi þá hlið mála sem hér er ymprað á. Hún skiptir nefnilega nokkru máli.

Fróðlegt væri svo að heyra skoðanir þessa norska heimspekings Ninu Karen Monsen á hjónabandinu og á samkynhneigð.

Á Íslandi eru reynt að berja niður allar skoðanir með harðri hendi sem ekki samrýmast réttrúnnaði þeirra sem móta umræðuna um hin ýmsu mál með því að hafa sig mest í frammi.

Húrra fyrir þeim sem hugsa ''öðruvísi''.

Veðráttan biluð á Tímarit.is og fleira

Aðgengi að  Veðráttunni á Tímarit.is er bilað. Aðeins er hægt að skoða fyrsta árganginn. Ef maður smellir á aðra árganga kemur bara alltaf upp fyrsti árgangurinn.

Þetta verður að laga. 

Á Akureyri, Staðarhóli í Aðaldal og Mýri í Bárðardal er úrkoma þessa maímánaðar sem nú er liðin að einum þriðja þegar komin yfir mánaðarmeðaltalið. Á Staðarhóli féll 48 mm úrkoma á tveimur sólarhringum. Talsvert af henni var snjór og mældist snjódýpt þar í gærmorgun 14 cm.  Snjór er nokkur í grenndinni og sömuleiðis yst á Tröllaskaga og í Svarfaðardal. Smávegis snjór er á stöku öðrum stað. Hins vegar er snjólaust á ýmsum stöðum þó snjóakort Veðurstofunnar gefi annað til kynna.

Nú er kuldakastið liðið hjá og kom ekki frost í Reykjavík. 

 

Morðæði

Hvað er að fólki að telja hunda og ketti meindýr? Svo stendur í fréttinni:

Síðan það spurðist út að kominn væri aðili sem tæki að sér að sinna þessari nýju reglugerð hefur ekki sá dagur liðið sem hringt sé í mig og kvartað út af lausum hundum sem flaðra upp um fólk eða eru að gera stykki sín í görðum þess og köttum sem eru búnir að fara inní ókunnug hús, uppí barnavagna eða gerandi stykkin sín í sandkassa barna.  Ég hef gert mitt besta til að handsama þessi dýr og koma þeim til sinna réttu eiganda eins fljótt og auðið er, jafnvel keyrt þeim upp að dyrum þrátt fyrir að mér beri engin skylda til samkvæmt nýrri reglugerð,  að gera.

Ekki kæmi mér á óvart þó hér sé í fyrsta lagi ýkt fram úr öllu hófi. 

En hvað með það þó hundur flaðri upp um vondan mann? Fátt ætti betur að mýkja hart  og hortugt hjarta. Eða kúki smávegis í einhvern garð. Það er í hæsta lagi óþægilegt en hvernig geta menn fengið af sér að drepa saklaust dýr sem stendur þeim langtum framar út af slíkum smámunum? Hvers konar puntdúkkur eru að rækta illgresislega garða sína?

Ef ókunnur köttur kæmi inn í mitt hús myndi ég taka honum með kostum og kynnum.

Hvað er að einu bæjarfélagi sem bannar ''lausagöngu'' katta.  Það er verra en nokkur fasismi. Má ekki gefa út reglugerð um að bæjarstjóri slíks bæjar sé réttdræpur hvar sem er?

Margir skilja ekki hvað eigendur katta og hunda binda sterkar tilfinningar við dýrin sín. Það getur tekið margra mánaða sorg þegar köttur eiganda er myrtur. Afsökunarbeiðni breytir þar engu um. 

Ef einhver myrti hann Mala. Þá væri mér að mæta!

Og morðinginn fengi örugga vist í helvíti eftir dauðann þar sem hann myndi kveljast frá eilífð til eilífðar.

 

Meindýraeyðir ver sig

Gæti verið verra

Nú er ekki beint vorlegt. Það er norðansveljandi og snjóað hefur fyrir norðan. Sums staðar á láglendi hefur fest snjó þar sem snjólaust var orðið.

En þetta er samt ekkert sérlega hart kuldakast miðað við það sem getur orðið.

Þennan dag árið 1943 var einmitt mikið kuldakast og þá mældist lægsti meðalhiti þennan dag í Reykjavík frá stofnun Veðurstofunnar 1920 og sennilega enn lengur. Meðalhitinn var -4,3 stig  en lágmarkið -7,2 og ekki hlánaði allan sólarhringinn. Á Grímsstöðum á Fjöllum var þá 15 stiga frost. Í dag hefur ekki gert frost í Reykjavík og fór hitinn í 5,7 stig en 11 í Vík í Mýrdal.

Meðalhitinn á láglendi verður líklega hvergi undir frostmarki þennan sólarhring. En mun kannski gera það á morgun fyrir norðan.

Fjölmörg kuldköst á þessum árstíma hafa verið miklu verri. Samt er þetta leiðindaveður. Það er  þó bót í máli að hlýindi eru framundan. Þetta verður stutt skot.

Á þessum árstíma er mikil vorhlýnun að jafnaði í gangi  af  árstíðalegum ástæðum og hlýnar kringum heilt stig á viku. Veðurkort frá 14. maí 1955 slær þetta vesældalega kast núna því heldur betur út. 

Það er eiginlega ofrausn að gera mikið úr þessu kuldakasti sem nú er.

 

 

Algjör viðbjóður

Samningurinn sem fegurðardísirnar verða að samþykkja og hafa samþykkt án þess að mögla er auðvitað ekki samningur, samkomulag, heldur er hann einhliða skilyrði til að fá að taka þátt í keppninni um fegurðardrottningu Íslands. Þetta var að koma fram í Kastljósi.

Stelpurnar láta sig hafa það af afsala sér allri virðingu og persónulegum réttindum.

Þó þær séu ungar eru þær fullorðnar konur en ekki börn.

Enginn skyldar þær til að skrifa undir. Manneskja sem bæri lágmarksvirðingu fyrir sjálfri sér myndi ekki aðeins hrökkva frá svona samningi heldur vekja athygli yfirvalda á ósómanum.

Þetta er nú það sem snýr að stelpunum. En þar fyrir utan er keppnishaldarinn sem býður slíkan samning algjör viðbjóður og sömuleiðis þau tíu fyrirtæki sem styðja þessa keppni.

 

Bretar

Mér dettur ekki í hug að vera illa við Breta.

Stjórnvöld ríkja eru ekki þjóðirnar. 

Breska ríkisstjórnin er varla verri en sú íslenska ef út í það er farið.

Stjórnmálasamskipti ríkja eru alltaf eigingjörn og ómerkileg. Þar er aldrei vinátta, bara hagsmunir.

Ég harðneita að setja samasemmerki á milli ríkisstjórna og þeirra þjóða sem þær stjórna.

Bretar eru ágætir. Íslendingar líka.

Allar þjóðir eru það. 

En hvað með morð

Það er nú mjög í tísku að krefjast harðari refsinga fyrir afbrot, svo sem líkamsmeiðingar, dópsmygls og kynferðisbrota. 

Harðar refsingar virðist vera kjörorð dagsins. Af því við viljum lifa í svo góðu þjóðfélagi.

En hvað þá með morð? Það er yfirleitt talið alvarlegasti glæpur sem hægt er að fremja. Fyrir morð er oftast dæmt í 16 ára fangelsi en inni sitja menn hálfan þann tíma.

Verða menn ekki að vera sjálfum sér samkvæmir? Ættu þeir sem heimta harðari refsingar fyrir alls konar brot ekki að krefjast harðari refsinga fyrir morð?

Hvað væri hæfileg refsing? Kannski 800 hundruð ára fangelsi eins og dæmt er fyrir stundum í útlöndum?