Haustið þegar ekki haustar

Það er lítið lát á veðurblíðunni á suður-og vesturlandi og að nokkru leyti um allt land. Í gær mældist hitinn í Reykjavík mestur 14,6 stig í glampandi sólskini. Í nótt fór hann ekki lægra þar en í 10,0 stig. Mesti hiti á landinu á stöðvum  Veðurstofunnar voru 17,0 stig á Þingvöllum á  sjálfvirkan mæli.  Það er hærra en mældist þar nokkru sinni á kvikasilfursmæli og reyndar líka á sjálfvirkan mæli. Á Hvervöllum mældust 13,1 stig en þar mældist mest á kvikasilfri meðan þannig var mælt 12,0 stig en í þessum október hefur það met  verið tvíslegið, í gær og svo 12,7 stig þ. 4.

Við skíðaskálann í Seljalandsdal við Ísafjörð mældist í gær 18,5 stig en þessi mælir sýnir oft grunsamlega háar tölur. Hins vegar mældust á stöðvar Vegagerðarinnar 17,4 stig á Biskupshálsi á norðausturlandi og 17,2 stig á Gemlufallsheiði á Vestfjörðum en þetta er á fjallvegum.

Ekki hafa nein stöðvarmet á stöðvum sem enn mæla á kvikasilfursmæli verið slegin.  Í gær mældust mest á þeim 15,0 stig á Hjarðarlandi í Biskupstungum.

Það er óvenjulega hlýtt loft yfir landinu. Á hádegi í gær voru 10,6 stig í 1552 m hæð yfir Keflavík og frostmarkshæð var yfir 3000 m í allan gærdag og var það enn á miðnætti í nótt. 

Meðalhiti október það sem af er í Reykjavík er nú 9,6 stig, sem er um hálfu stigi meira en meðaltal alls júnímánaðar 1961-1990 og 4,2 stig yfir meðallagi. Það er með því hæsta sem finna má fyrstu tíu dagana í  október. Hlýrra var þó 1959, 11,0 stig. Veðurlag þá var öðruvísi en núna, þungbúið og úrkomusamt syðra. Mikil árstíðaleg kólnun er vitaskuld í gangi frá fyrsta til síðasta dags í október.

Eftir daginn í dag er næsta víst að meðalhitinn í bænum mun enn stíga. 

Hlýjustu októbermánuðir sem mælst hafa í Reykjavík eru 7,9 stig 1915 sem var líka sólarminnsti október sem þar hefur nælst og 7,7 stig 1959 og 1946. Á Akureyri var síðastnefndi mánuðurinn sá hlýjasti, 7,9 stig. Þar er meðalhitinn það sem af er núna 8,3 stig. 

Það sem er kannski merkilegast með veðrið núna hvað það er hægviðrasamt og sólríkt. En þetta getur ekki gengið lengi svona hlýtt með núverandi veðurlagi þó gott sé. Ef mánuðurinn ætlar að vera áfram í fremstu röð hvað hlýindi varðar verður að koma heiðarleg sunnanátt með ''roki og rigningu'' fyrir sunnan en háum hita allan sólarhringinn um allt land.

Áfram er hægt að fylgjast í fylgiskjalinu með veðrinu í þessum mánuði í Reykjavík og fyrir landið (blað 1)  og á Akureyri (blað 2). 

Og á öðru skjali er hægt að sjá veðurmet allra mánaða á nær öllum mönnuðum veðurstöðvum. Eins og sjá má getur hiti á einstökum stöðvum í oktober,  sérstaklega fyrir norðan og austan, farið talsvert hærra en nú.

Ekki eru þarna sjálfvirku stöðvarnar en hitamet á þeim (og reyndar öllum stöðvum)  í október má  sjá á síðu Trausta Jónssonar.

Hér er Modis mynd af landinu kl. 14:55 í gær. 

 

Skrár tengdar þessari bloggfærslu:

• rv_2010_8_22_0.xls

Október verður að duga eða drepast

Október byrjar með hitalátum. Meðalhiti fyrsta dagsins var fimm stigum yfir meðallagi bæði í Reykjavík og á Akureyri. Þeir voru eins og alveg sómasamlegir hásumardagar. Í Reykjavík naut meira að segja sólar dálítið um hádaginn.

Eitt hitamet var slegið, 14,8 stig á Bláfeldi sem er sunnanmegin á Snæfellsnesi. Mælingar hófust reyndar aðeins árið 1998. En frá 1955 hafa hámarksmælingar verið gerðar á nokkrum stöðum í nágrannasveitunum en svona mikill hiti mældist aldrei á þeim í október.

Áfram verður hægt að fylgjast með daglegu veðri í Reykjavik og á Akureyri á þessari síðu, ásamt hæstum hita og mestri úrkomu á landinu. Hægt verður að fara beint inn í bloggflokkinn Mánaðarvöktun veðurs þar sem þetta skjal verður uppi allan mánuðinn. Kannski þarf stundum að skrolla skjalið svolítið þegar það kemur upp.

Árið er nú í góðri hitaþjálfun og væntum við mikils árangurs af þessum október. Ekki verður við annað unað en hann skáki október 1915 og taki inn 8 stigin í meðalhita eins og að drekka vatn. Standa til þess glæstar vonir því vatnshellingur sótti mjög í sig veðrið síðustu daga septembermánaðar.

Október þarf nauðsynlega að fara að reka af sér það slyðruorð að vera eftirbátur annarra mánaða í hlýindunum síðustu ár. 

Nú er að duga eða drepast fyrir hann.

 

Skrár tengdar þessari bloggfærslu:

• rv_2010_8_19_0.xls

Hlýjasta sumarið

Meðalhitinn í september í Reykjavík reyndist 10,2  stig. Þar með er ljóst að meðalhiti allra sumarmánaðanna, júní til september, er 11,7 stig. Það er mesti sumarhiti sem mælst hefur í Reykjavík eftir að mælingar urðu nokkuð áreiðanlegar. 

Gamla metið var 11,6 stig frá því sögufræga ári 1939.

Þessar tölur eru miðaðar við núverandi staðsetningu Veðurstofunnar.

Árin 1932 til 1945 var mælt á þaki Landssímahússins við Austurvöll. Þær mælingar hafa þótt  þarfnast nokkurra leiðréttinga við. Ljóst er að á þessum árum  voru sumrin í Reykjavík  nokkuð óeðlilega hlý miðað við aðrar stöðvar. Þarna er vitanlega dálítil óvissa á sveimi  en það gengur  þó ekki upp að mínu mati að taka tölurnar frá Landsímahússárunum alveg bókstaflega ef menn vilja reyna að átta sig á hlýjustu sumrunum. Ýmis sumur, sem engar sérstakar rósir gerðu, ota sér þá fram í raðir hlýrri sumra, ekki kannski þeirra allra hlýjustu samt (fyrir utan metsumrin 1939 og 1941). En ekki fer ég nánar út í þessa sálma.

Ýmislegt er merkilegt með sumarið í ár. Júní var sá hlýjasti sem mælst hefur í Reykjavík eftir 1870 og einnig júlí, ásamt júlí 1991. Ágúst varð fimmti hlýjasti og september sá sjötti. 

Mér sýnist líka að þetta sumar sé það hlýjasta sem komið hefur í Stykkishólmi frá 1846 og í Vestmannaeyjum frá 1878.  

Á Akureyri voru sumrin 1933, 1939, 1941 og 1894 hlýrri en núna. 

En það er kannski merkilegast við sumarið að það virðist vera eitt af þeim allra hlýjustu á landinu í heild eftir þeim stöðvum að dæma sem lengst hafa athugað. Sumarið 1939 var hlýrra en þetta sumar núna er á borð við sumrin 1933 og 1941. Næst koma svo eftir mínum pælingum 2003, 2004, 2008, 1953 og 1880. 

Á fylgiskjalinu má sjá hita, sól, úrkomumagn og fjölda úrkomudaga í öllum mánuðum tólf hlýjustu sumranna í Reykjavík, ásamt meðaltali þessara veðurþátta 1961 til 1990 og 1931 til 1960. Býsna mikill munur er á hitanum milli þessara tímabila.

Sitthvað er þarna skemmtilegt og veðurfanavænlegt! Áður hefur þess verið getið að þetta sumar skartar bæði hlýjasta júní og júlí. Verður nú  ýmislegt nefnt  varðandi  önnur þau sumur sem þarna eru talin:

Júlí 1939 er sá sólríkasti sem mælst hefur í Reykjavík en ágúst það ár sá úrkomusamasti og september sá hlýjasti! 

September 1941 er sá hlýjasti á landinu þó afar litlu muni á honum og 1939 sem var nú samt ljúfari  mánuður.  

Ágúst 2003 var ekki aðeins hlýjasti ágúst í Reykjavík og á landinu heldur mun hann einnig  vera hlýjasti mánuður yfirleitt sem nokkru sinni hefur mælst á Íslandi. Júní var þá sá hlýjasti sem komið hafði í Reykjavík en var sleginn út af okkar júní 2010. Júni bætti um betur með því að vera kannski úrkomusamastur allra júnímánaða á landinu ef miðað er við úrkomuna á þeim stöðvum sem allra lengst hafa athugað. 

Ágúst 2004 var sá fjórði sólarmesti og í þeim mánuði kom minnisstæð hitabylgja sem hugsanlega er sú mesta sem komið hefur á landinu síðustu áratugi. Þá mældist eini dagurinn í Reykjavík sem hefur meðalhita sólarhringsins yfir tuttugu stigum.

Sólskinsstundir sumarið 2008 hafa ekki verið fleiri síðan 1957 og er sumarið hið áttunda sólríkasta. Júní var sá þriðji sólarmesti. Í lok júlí mældist mesti sem mælst hefur í Reykjavík . September hefndi sín hins vegar með því að vera líklega sá úrkomumesti á landinu.   Auk þess mældist þá mesta mánaðarúrkoma á veðurstöð í september og mesta sólarhringsúrkoma.      

Sumarið 1933 var það hlýjasta sem komið hefur fyrir norðan. 

Sumarið 1880 var langhlýjasta sumar sem mælt var á nítjándu öldinni á landinu.

Árið 1960 voru fleiri úrkomudagar í júní í borginni en í nokkrum öðrum júní og hann  var sá 8. sólarminnsti. Úrkomudagar   hafa hins vegar aldrei verið færri en þá var í júlí og einnig í ágúst sem var sá sólríkasti sem mælst hefur í bænum. ''Öfgar'' í veðurfari eru sem sé ekki nýmóðins uppfinning! Í þessum ágúst mældist á Teigarhorni minnsta mánaðarúrkoma sem mælst hefur  í  nokkrum ágúst  á veðurstöð,  0,6 mm. Og er þetta talin þurrasti ágúst  á landinu.  Hvort sem menn vilja trúa því eða ekki  kom ekki  í nokkra áratugi  eftir þetta verulega gott sumar á suðurlandi, stjörnusumar eða stórsumar eins og menn vildu víst kalla það nú á dögum. Eitthvað annað en er núna!

Sumarið í fyrra var óvenjulega þurrt, sérstaklega í júlí. 

Þessir merkismánuðir eru auðkenndir með rauðu í fylgiskjalinu en það sem auðkennt er með svörtu eru mánuðir sem fara nærri metum með það hafurtask sitt sem merkt er án þess þó að setja met.

Nú vaknar náttúrlega sú spurning af hverju þessi sumur voru svona hlý og hvort þau eigi eitthvað sameiginlegt varðandi veðurkerfi, háloftastrauma og hvað eina. En ekki verður hér farið út það. 

Það er svo  hægt í neðra fylgiskjalinu að sjá glæsilega frammistöðu septembers sem bjargaði gullinu fyrir sumarið okkar í Reykjavík!

Loks er bónus með ljúfasta fyrsta október í Reykjavík og kannski víðar. 

Viðbót 1.10. Október byrjar aldeilis vel. Hér fyrir neðan er kort frá kl. 15. Það minnir  nokkuð  á kortið 1. október 1958. Stóri munurinn er þó sá að þá var Elvis í fullu fjöri! Vöktunin heldur svo áfram hér á síðunni á október.

 

 

 

 

 

 

 

 

 

 

 

 

 

 

 

 

 

 

 

 

Skrár tengdar þessari bloggfærslu:

• rv_2010_8_17_0.xls
• rvkhlys_0.xls

Fyrsti haustsnjór í Esju

Meðalhitinn í september hefur hríðfallið í rúmlega viku eins og reyndar við var að búast eftir að óvenjuleg hlýindi tóku enda. Meðalhitinn í Reykjavík er nú 10,9 stig og er enn 2,9 stig yfir meðallagi. Á Akureyri er meðalhitinn 10,2 stig eða 3,2 stig yfir meðallagi.

Þessi september ætlar ekki að verða með allra hlýjustu septembermánuðum eins og hann hafði alla burði til eftir fyrsta þriðjunginn.  Hann hefur síðustu daga verið leiðinlega kaldur þó engir stórkuldar hafi samt verið. Ekki hefur enn gert næturfrost í Reykjavík en því er spáð alveg á næstunni  hvort sem það gengur nú eftir eða ekki. Það hefur heldur ekki frosið á Akureyri og reyndar mjög víða á suður og vesturlandi og við sjóinn á norðvestanverðu landinu og á austfjörðurm. Í Reykjavík hafa þrír fjórðu septembermánaða síðustu 30 ár verið frostlaustir svo frostlaus september eru engin sérstök tíðindi.

Í morgun hafði snjóað í Esju í fyrsta sinn á þessu hausti. Í Gunnlaugsskarði mátti sjá að jörð  var  gráhvít.  

Til þess að sumarið í Reykjavík verði það hlýjasta sem mælst hefur þarf það sem eftir er mánaðarins að vera 7,9 stig að meðaltali.  Næstu tveir dagar a.m.k. verða svalir en heldur hlýnar eftir það. En vonin um metsumar í hlýindum er veik.

Áfram er hægt að fylgjast með september í fylgiskjalinu.  

Skrár tengdar þessari bloggfærslu:

• rv_2010_8_11_0.xls

Hvað gerir septemberinn okkar?

Meðalhitinn í september í Reykjavík er nú 12,7 stig eða 4,3 stig yfir meðallagi. Aðeins einn dagur,  sá 13., hefur verið undir meðallagi.  Ef mánuðurinn yrði 4,3 stig yfir meðallagi allt til loka yrði hann á mörkunum að vera hlýjasti september sem mælst hefur.

Því miður eru ekki miklar líkur á að svo verði, hvað þá að hann verði enn hlýrri. 

En það er alls ekki útilokað að sumarið í heild, júní til september, eigi eftir að verða það hlýjasta sem mælst hefur. Og miða ég þá við núverandi staðsetningu Veðurstofunnar. En þá verður meðalhitinn í september að ná 9,8 stigum. Það er ansi há tala og hefur ekki náðst nema fimm eða sex sinnum frá aldamótunum 1900. 

Ég giska á, eftir spám,  að þ. 20. verði meðalhitinn í þessum september kominn niður í um 11 stig. Þá þyrfti það sem eftir er að ná 7,6 stigum að meðallagi. Það er 1,2 stigum yfir meðallaginu 1961-1990 fyrir síðasta þriðjung septembermánaðar en hins vegar í meðallagi miðað við 1931-1960.

Munurinn á meðalhita mánaðarins milli þessara tveggja tímabila er ótrúlegur og ekki meiri í neinum mánuðum nema nóvember og desember.

Satt að segja finnst mér það nokkuð snautlegt ef september ætlar alveg að hrynja. Það er nú ekki nema 15. í dag. En hitinn mun varla merja mikið meira en fara upp í 10 stig í Reykjavík í dag ef hann þá gerir það.

Fáir dagar ársins finnst mér eins sjarmerandi sem síðseptemberdagar, ekki síst um jafndægur,  sem eru bæði bjartir og hlýir. Þá verður hitinn að ná tíu stigum, það er hins vegar ekkert varið í bjarta daga með 6-8 stig hita. Þeir eru tvímælalaust annars flokks. Og hitinn má ekki bara merja tíu stigin einhvern tíma dagsins heldur vera yfir þeim, helst 10-13 stig alveg frá hádegi til kl. 6 síðdegis. Svona dagar geta hæglega komið. Og þegar þeir koma kemst ég alltaf í einvers konar kveðjustemningu. Aldrei að vita nema maður lifi ekki næsta vor. Ég fer að hlusta á 19. aldar síðrómantík, Ljóð jarðar eftir Mahler eða Fjóra síðustu söngva eftir Richard Strauss sem fluttir  verða  á  næstu sinfóníutónleikum, tala nú ekki lagið September sem er eitt af lögunum í þeim flokki.

Stundum komu ekki svona dagar síðla í september i Reykjavík, annað hvort bara skýjaðir og regnþrungnir dagar eða ískaldir norðanáttadagar sem vekja upp októberstemningu. En þessi síðsumarsblær sem ég er að vísa til er septemberfyrirbrigði. Það er einstakur blær yfir veröldinni þegar slíkir dagar koma, trén eru enn laufum skrýdd til að sjá og birtan er sumarbirta en ekki jafn skær og um hásumarið. Það er síðrómantísk birta, mild, munúðarful og seiðandi.

Til að menn skilji hvers konar daga ég á við kemur hér kort með einum slíkum.

Skyldi maður upplifa svona góða daga seint í þessum mánuði? 

Hér er svo áfram hægt að fylgjast með september, bæði í Reykjavík og á Akureyri, blaði eitt og tvö í fylgiskjalinu.  

 

 

Skrár tengdar þessari bloggfærslu:

• rv_2010_8_10_0.xls

Saga hlýindanna

Spáð er nú hlýrra og sólríkara veðri fyrir norðan en fyrir sunnan um helgina. Það er kannski kominn tími til í þessum júlí. Hlýindunum á suður og vesturlandi er hér með lokið í bili. Þau voru bara þó nokkur á svæðinu frá V-Skaftafellsýslu til Borgarfjarðar og jafnvel til Breiðafjarðar. Hér er rakinn saga 20 stiga hita eða meira á mönnuðum veðurstöðvum frá 16. júlí þegar hlýindin hófust . 

16. júlí.   Eyrarbakki 20,5, Hæll í Hreppum og Keflavíkurflugvöllur 20,0.

17. júlí. Keflavíkurflugvöllur 23,0, Reykjavík 21,4, Kirkjubæjarklaustur og Hjarðarland í Biskupstungum 21,2, Eyrarbakki 21,0, Hæll 20,5.

18. júlí. Hæll 23,3, Hjarðarland 23,0, Eyrarbakki og Kirkjubæjarklaustur 22,0, Stafholtsey í Borgarfirði 21,6, Bláfeldur á sunnanverðu Snæfellsnesi 20,4.

19. júlí. Hjarðarland 23,2, Hæll 21,3, Stafholtsey 23,1, Bláfeldur 21,1, Ásgarður í Dölum 21,7, Lambavatn á Rauðsandi 20,1.

Þegar hér var komið voru mestu hlýindin dottin niður.  

20. júlí. Kirkjubæjarklaustur 21,8. Aðeins Kirkjubæjarklaustur hélt þennan dag uppi hitaheiðri landsins á mönnuðum stöðvum! Næsta dag hafði hitalandslagið breytt nokkuð um svip.

21. júlí. 21,0 Reykir í Hrútafirði (sko hana, einhverja hrútleiðinlegustu veðurstöð landsins!) og Staðarhóll í Aðaldal, Ásgarður 20,5, Hæll 20,4, Hjarðarland 20,2.  Litlu munaði að 20 stig næðust í Litlu-Ávík á Ströndum en þar mældust 19,7 stig.

Eins og sjá má hafa hlýindin verið mest og lengst á suðvesturlandi.   

Á sjálfvirkum veðurstöðvum hefur 20 stiga hiti eða meiri mælst á þessum stöðvum  (sleppt þeim þar sem líka eru mannaðar stöðvar): Reykjavíkurflugvöllur, Einarsnes í Skerjafirði, Geldinganes, Hólmsheiði, Korpa, Kjalarnes, Miðdalsheiði, Sandskeið, Skrauthólar á Kjalarnesi, Þyrill, Akrafjall, Fíflholt á Mýrum, Hafnarfjall, Hafnarmelar, Hafursfell á Snæfellsnesi, Húsafell, Hvanneyri, Litla-Skarð, Hraunsmúli í Staðarsveit, Vatnaleið á Snæfellsnesi, Brattabrekka, Svínadalur í Dölum, Gillastaðamelar, Reykhólar, Grundarfjörður, Skíðaskálinn í Seljalandsdal, Súðavík, Haugur í Miðfirði, Brúsastaðir í Vatnsdal, Sauðárkrókur, Nautabú, Möðruvellir í Hörgárdal, Reykir í Fnjóskadal, Stjórnarsandur, Lómagnúpur, Skaftafell, Hvammur undir Eyjafjöllum, Básar á Goðalandi, Þykkvibær, Sámsstaðir, Hella, Skálholt, Árnes, Búrfell, Mörk á Landi, Gullfoss, Þingvellir, Þjórsárbrú, Kálfhóll, Ingólfsfjall, Grindavík, Þrengsli.  

Eins og sjá má hafa hitarnir varla náð til norðurlands og alls ekki til austurlands.

Mesti hiti hvers dags á landinu (á mannaðri eða sjálfvirkri veðurstöð):

16. Eyrarbakki 20,5.

17. Þingvellir 24,1.

18. Hella 24,2.

19. Hafursfell 23,4.

20. Stjórnarsandur við Kirkjubæjarklaustur 22,9.

21. Brúsastaðir í Vatnsdal 21,7.

Glampandi sólskin var þar sem hlýindin náðu sér á strik.

Nú spyr ég: Hvað hefði verið rætt og ritað á bloggi og í blöðunum ef sól og yfir 20 stiga hiti hefði mælst á mörgum veðurstöðvum dag eftir dag í glaðasólskini á svæðinu t.d. frá Skagafirði til Fljótsdalshéraðs? Það hefði ekki linnt látum yfir blíðunni fyrir norðan og látið svona fylgja með að þar væri alltaf besta veðrið. Reyndar var nokkuð gert með þessi sunnlensku hlýindi en ég held að það hefði verið miklu meira ef þau hefðu bara verið fyrir norðan. Og mér sýnist á tali manna oft á bloggi og fasbók, sem auðvitað ristir ekki djúpt og ætlar sér það ekki, að fjöldi fólks standi raunverulega í þeirri meiningu að meiri veðurblíða sé svona yfirleitt fyrir norðan á sumrin en fyrir sunnan. Það er nú bara einfaldlega rangt.

Enga trú hef ég svo á því að hlýindin næstu daga verði eins stöðug og langvinn  fyrir norðan og austan og hlýindin voru þó á suður og vesturlandi.

Samt er bara að vona að hitar og sólskin verði sem mest og víðast á landinu það sem eftir lifir sumars.      

 

 

Blíða fyrir norðan og austan

Snjóléttur og mildur vetur í Reykjavík

Alltaf hefur mér fundist 1. apríl fyrsti dagur vorsins. Það er þó ekki mildinni fyrir að fara að þessu sinni. Í nótt fór frostið í Reykjavík niður í 8,9 stig en 16,1 á Þingvöllum og 14,4 stig á Staðarhóli í Aðaldal. Meðalhiti gærdagsins var sá minnsti í Reykjavík í öllum marsmánuði og líklega annað hvort kaldasti eða næst kaldasti dagurinn á öllu landinu. Á morgun verður síst betra og má þá jafnvel búast við éljum suðvestanlands. Eftir það á víst að hlýna. Það verður kannski komin þolanlegur hiti á daginn hér syðra á páskadag. Kaldir páskar finnst mér hálfgert ómark því páskarir eru í mínum huga tengdir vorinu. Allra verstir eru þó hvítir páskar á láglendi.

Meðalhiti mars í Reykjavík var 3,1 stig og kólnaði um meira en eitt stig síðustu fimm dagana.

Menn tala um hlýjan vetur. Meðalhiti vetrarins, desember til mars, er í Reykjavík 1,6 stig. Og það er 1,6 stig yfir meðallagi. Talsvert hlýrra var þó veturna 2002-2003 og 2005-2006. Aðrir vetur sem hafa verið hlýrri í Reykjavík eru 1972, 1964, 1963, 1948, 1946, 1942, 1929 og 1923. Veturnir 1954, 1953 og 1934 voru svipaðir að hita og nú. Veturinn núna kemst eftir þessu ekki á topp tíu hlýindalistann. Á öllu landinu sýnist mér hitafrávikið frá meðallagi vera rétt rúmlega eitt stig og eru þá enn fleiri vetur sem hafa verið hlýrri en þessi á landinu öllu en í Reykjavík. 

Mjög lítill snjór var í Reykjavík. Í október var einn dagur alhvítur, enginn í nóvember, 5 í desember, enginn í janúar, þrír í febrúar og í mars kringum fimm dagar. Nokkrir dagar í vetur voru flekkóttir af snjó. En alhvítir dagar frá því í haust hafa einungis verið eitthvað í kringum 14. Þeir hafa aldrei verið færri frá því í september til mars síðan talningar hófust árið 1924. Snjóleysið heyrir því út af fyrir sig til meiri tíðinda en vetrarhlýindin sem slík.

Snjóleysið og mildur vetur þó hann sé ekki með þeim allra hlýjustu er það sem ræður þeirri tilfinningu manna að ''enginn vetur'' hafi verið í Reykjavík að þessu sinni.

Veðrið getur verið duttlungafullt. Gífurlegur hitamunur getur til dæmis verið milli sömu  mánaðardaga eftir árum. Hér fyrir neðan má sjá kort frá hádegi frá hlýjasta og kaldasta 1. apríl sem komið hefur á landinu rúmlega síðustu sextíu árin.

 

 

 

 

 

 

 

 

 

 

 

 

 

 

 

 

 

 

 

 

 

Úrkomu- og snjódýptarmet á Akureyri

Ekki fæ ég betur séð en úrkoma í þessum desember á Akureyri sé meiri en mælst hefur í þessum mánuði síðan mælingar hófust 1925. Hún mældist 127,4 mm en gamla metið var 123,8 mm frá 1992. 

Snjódýpt mældist 90 cm á Akureyri í gærmorgun. Það er mesta snjódýpt sem þar hefur mælst í desember en sú næstmesta var 85 cm þ. 19. árið 1992.

Meiri snjódýpt en þetta hefur mælst á Akureyri einhvern  tíma alla mánuðina frá janúar til apríl.

Allra mest snjódýpt hefur þar mælst 160 cm þ. 15. janúar 1975. 

Ekki mátti tæpara standa

Nóvember var frostlaus í Vestmannaeyjum. En í nótt fór að frjósa þar.  Klukkan þrjú í nótt sýndi sjálfvirki mælirinn fyrst frost og á sama tíma var lesið -0,1 stig á kvikasilfursmælinum. Klukkan níu sýndi lágmarksmælirinn svo að mest hafði frostið orðið -0,9 stig.

Í Surtsey var hitinn á hádegi 0,0 stig en lágmarksmælirinn hafði mælt -0,2° stig á síðustu klukkustund. Þetta er fyrsta frostið þar. 

Það mátti sem sagt ekki tæpara standa með frostlausan nóvember á Stórhöfða, Vestmannaeyjabæ og Surtsey. 

Hins vegar má ekki gleyma því að í október mældist frost bæði á Stórhöfða og í bænum þó nóvember hafi verið frostlaus. Það hefði verið meira gaman ef þar hefði ekki frosið í október en slíkt hendir stundum.

Í Surtsey er frostið sem var að mælast rétt áðan hins vegar fyrsta frostið sem þar hefur mælst í allt haust. 

Dæmi eru um frostlausan mars á veðurstöð og nú nóvember.  Syðst á landinu ætti að geta orðið  frostlaust frá því einhvern tíma í febrúar og fram í desember við allra óvenjulegustu aðstæður. 

Frostlaus nóvember syðst á landinu

Á Stórhöfða í Vestmanneyjum mældist aldrei frost í þessum nóvember á kvikasilfursmæli. Fór lægst í 0,5 stig. Þar fraus hins vegar í október. 

Í Vestmannaeyjabæ mældist heldur ekki frost í mánuðinum á sjálfvirkan mæli og í Surtsey hefur enn ekki frosið í allt haust á sams konar mæli.

Aðeins einu sinni hefur það gerst að mönnuð veðurathugunarstöð mæli ekki frost í nóvember. Það var á Hólum í Hornafirði í nóvember 1931 en þá mældist  0,0 stig.

Þessi mánuður var hlýr þar til síðustu dagana og  verður vel yfir meðallagi  þegar upp verður staðið en samt mjög langt frá öllum metum. 

Nema þessu undarlega meti, í þó ekki hlýrri mánuði, sem ég var að nefna.

Hæsti lágmarkshiti mánaðar sem nokkurn tíma hefur mælst á mannaðri veðurstöð í nóvember.